uMthunywa
Nkosilathi Sibanda
KULENDODA yeCollen Bawn eGwanda engaboniyo emehlweni esendebeni zezakhamizi zakulindawo kulandela ukwetheswa icala lokudlwengula umntwana oleminyaka eyisificaminwe mibili yokuzalwa.
Umsolwa uObert Mguni, umiswe phambi kukamantshi uNkosazana Caroline Matanga eGwanda kuyonale iviki.
UMguni oleminyaka yokuzalwa engu-51, ohlala ku-Number 3 Nelson, eCollen Bawn wetheswa icala lokudlwengula.
Umtshutshisi kulelicala uZanele Sithole utshele inkundla ukuthi mhlaka 26 Mabasa lonyaka, uMguni, owaziwa esigabeni engaboni emehlweni, wadlwengula lumntwana egcekeni lamasimu e-Nelson Range Dubane kulindawo.
Inkundla izwe ukuba ngelanga lesehlakalo, umamangala wayehamba labangane bakhe ababili abaleminyaka emihlanu yokuzalwa, bekhaphe umsolwa ukuyakukha imbhida esivandeni.
Kubikwa uMguni watshela abantwana ababili laba ukuthi bayezama ukukha imbhida kwesinye isivande, yena asale lomamangala bebodwa.
Kodwa ke, abangane bakamamangala kubikwa bakuyala lokhu, besazi ukuthi uMguni ngeke akwazi ukuthi bami ngaphi njengoba engaboni.
Ngokunjalo, umsolwa wacabanga ukuthi sebehambile ikanti bamkhangele ekhumula isigqoko somngane wabo ngodlame.
Kubikwa uMguni walalisa umntwana phansi wamdlwengula kanye. Ngaleso sikhathi, kwaba lomuntu omdala ongumakhelwane owabona konke lokhu kusenzakala.
Ngokuzwa amanyathelo kaTshuma, kubikwa umsolwa waphanga wasukuma ebalekela imbuzo.
Kubikwa umakhelwane lowo wabuza ukuthi kwenzakalani kwasekuvela ukuthi uMguni ubehlukuluza umntwana lowo.
Inkundla izwe ukuba abangane bakamamangala ababili bafakaza ngokufanayo.
UMguni utshele uMantshi ukuthi kalacala njalo kazange azihlupha ngokucela ibheyili.
