YiNtatheli kaMthunywa
KULABOMAKOROKOZA abathathu abadabuka esigabeni seFilabusi okubikwa bedilikelwe ngumgodi bafela phakathi, eWest Nicholson uMthunywa ukuzwile lokhu.
Isiga lesi senzakale ngoMgqibelo kuviki esanda kwedlula ngesikhathi omakorokoza laba abavezwe ngokuthi nguBonet Phiri, Kenvas Mjunyambo kunye loMilton Phiri begebha igolide komunye umgodi owaziwa ngokuthi yiGeelong.
Omunye umfakazi uMnumzana Mncedisi Jiyane uveze ukuba umgodi lo lapho okwafela khona amadoda la wavalwa nguHulumende ngomnyaka ophelileyo ngakho omakorokoza laba bebegebha ngokungekho emthethweni.
“Umgodi lapho okwafela khona amadoda la wavalwa ngomnyaka ophelileyo ngoba usuyingozi ngakho abantu batshelwa ukuba bengagebhi kuwo. Omakorokoza laba bahamba ebusuku besiyagebha bengazi ukuba babezafela phakathi.
“Bakhona abanye njalo abake bafela emgodini lo eminyakeni edluleyo kodwa abantu kabafuni kulalela lokhu beqhubekela phambili besiyangena kuwo,” kuchasisa umfakazi lo.
Umfakazi lo uqhubekele phambili wathi omakorokoza laba kukhanya badilikelwa lilitshe ngakho bahle bafela khonapho.
Isikhulumi samapholisa esabelweni seMatabeleland South uInspector Philisani Ndebele uvumile ukuthi bamukele umbiko lo.
“Samukele umbiko wabomakorokoza abathathu abadilikelwe ngumgodi ngesikhathi begebha igolide. Omunye wabo uthwalelwe esibhedlela,” kuphetha uInsp Ndebele.