uMthunywa
Thokozile Mbedzi
KULABOMAKOROKOZA ababili bemgodini we-Amazon Syndicate Mine eMatopo abawelwe lilitshe phakathi komgodi bafa.
Kubikwa uThulani Ncube oleminyaka engu-38 lo Simon Gumede oleminyaka engu-30 behlelwe ngamashwa la kuviki ephelileyo betsheketsha emgodini.
Ekhuluma lentatheli kaMthunywa uMnumzana Godfrey Mathe uthe lokhe bengelankani ngesehlakalo lesi.
“Silapha sidanile ukulahlekelwa ngabanye bethu esisebenza labo ngoba yiwo umsebenzi esiphilisa ngawo izimuli zethu.
“Lokhu sisehluleka lokusebenza, amadoda la athi ephakathi emgodini awelwa yimbokodo yelitshe kwahle kwaba yikuphela kwawo,” kuchasisa uMnu Mathe.
Isikhulumi samapholisa esabelweni seMatabeleland South uInspector Loveness Mangena ebuzwa ngodaba lolu uthe solufikile ehofisini yabo njalo baxwayisa uzulu ukuthi atshiyane lomkhuba wokwemba okungekho emthethweni ngoba kuyingozi.
