uMthunywa
Nkosilathi Sibanda
UMONGAMELI weCouncil of Southern African Football Associations (Cosafa), u-Artur de Almeida e Silva, uthe ubona ukumiswa kweZimbabwe Football Association (Zifa) kuzavusa inkophe amazwe angomakhelwane bayo ngendlela ibhola okumele liphathwe ngayo.
IZifa lenhlanganiso ephethe umdlalo webhola eKenya zamiswa yiFederation of International Football Association (Fifa) ngoNhlolanja, ngenxa yokungenela kwenhlanganiso zepolitiki loHulumende ekuphathweni komdlalo.
FIFA
Ukumiswa kweZimbabwe kuphazamise inhlelo ze-Cosafa kumqhudelwano we-Cosafa Cup ka-2022 lasemdlalweni yokukhankasela i-Caf Africa Cup of Nations (Afcon) ka-2023.
“Uyabona-ke lesi yisixwayiso esikhulu ekutheni kungakabi lomonakalo osinyonyobelayo kumele silungise izinto kuhle.
Ngibona kuyisibonelo kithi esingabakhokheli beCosafa ukuthi kuzamele siguqule ingqondo yethu ngezinqumo ezizaphakamisa ibhola, hatshi thina uqobo.
“Sifunda into ejule kakhulu futhi ngilethemba lokuthi bonke abakhokheli benguqu bazavulwa amehlo bafunde kulokhu,” kutsho De Almeida.
