uMthunywa
Vusumuzi Ndlovu
LINJANI bafundi elizweni nje lonke jikelele, ngithemba lizakholisa ngekhefu leli. Ngithemba labo asebeleminyaka ephezulu kwengu-18 lenelisile ukuyavota. Kulokhe ngaqala ukuloba ngengoma zabaculi, ngike ngathatha ithuba lokubona imisebenzi esayilobayo, leminye ekhona nje emphakathini.
Lokhu senzela ukuba siqathanise njalo sitshengise ukuba sikhangeleleni kubo nxa umnyaka usiyaphela.
Ngiqale ngejaha leNorth End , uAsaph osekhuphuke kusilinganiso sokwaziwa emsakazweni weZiFM. Uthole isicoco sokuba ngowokuqala ngengoma yakhe uMambo, ayicula loFish McSwagg loTha Dawg. Ngijabule kakhulu ngibona ukuphumelela kwabafowethu uHwabaraty loMadlela Skhobokhobo. UHwabaraty wenze umcimbi omangalisayo kunyanga edluleyo esungula idlalade lakhe, elithi iSilwane. Ngakolunye uhlangothi sijabulela uSkhobokhobo ogcotshwe ukuba abengumkhangisi wenkampani yezocingo yakuleli. Uze wanconywa langu-DJ Sbu waseMzansi ebona inamnede lakhe libanjwe ngumculi wakithi kumabonakude womkhankaso.
Siqhubeka njalo ngemisebenzi, umkhandingoma omkhulu kuleli uP2DaOh ulemisebenzi yakhe esiyethulwe ngemisebenzi ka-2Dope loSkhu. U2Dope usungule ingoma uDope Movement, evala ukuthula ake akwenza ehleli singezwa kuye.
USkhu laye ngokufanayo ulengoma yakhe uSibusiso, ekhuluma ngenjabulo lentokozo elethwa nguSibusiso wakhe. UKhuxxman uyezwakala ekungoma esungulwe nguMsheznana, uCurrent Affairs 2 esisabalaliswe jikelele uBulawayo lelizwe lonke. Lapha uLwazi (Msheznana) ukhuluma ngemibono yakhe ngomumo wezinto elizweni.
UMUSE usekhuphe ividiyo yengoma yakhe ehlephunwe ku-Exquisite LyricsII. Ku-Social Commentary laye ubeka imibono yakhe, njalo efisa ukubona inguquko kwezinye inkinga ahlangana lazo emsebenzini wakhe.
UMsizkay uzabe ecula lo Cal_Vin kumcimbi kaMandla Da Comedian ekupheleni kwale inyanga. Siselapho sithanda ukuthi amhlophe kuCal_Vin oselendodakazi. Laye uhle wavele wenza akwazi ngcono waveza imizwa yakhe ngengoma uDaddy’s Little Girl.
Abaculi abanengi sebekhangelelwe ukwenza umazivelela besuka ekhazeni eseliphosa ukuphela livulela njalo ilanga. UNkanyiso Moyo odume ngo-Guluva7, usebenzela ukusungula ingoma uKhandaCool. Lingoma izaphekelwa ividiyo eqondiswe nguRasquesity osedume ngomdlalo wakhe uDlala Ngamla.
Asiqhubekeni sisebenza baculi, imisebenzi yethu iyabonakala, Halala!
