uMthunywa
UKUNQOTSHWA kweqembu le-Arsenal imidlalo emihlanu ilandelana sekudale inkathazo kubalandeli bayo kuleli.
Ukucaphuka okwembese impilo yabalandeli laba kuyabonakala lasemaphandleni lapho okubikwa ukuba akusagqokwa lesikipa seqembu.
I-Arsenal bathi idliwa nsukuzonke, okuyikhona okwehlise inhlonipho kuleliqembu elibalelwa kwezinkulu kunguqu yaseNgilandi.
Kodwa, ngokuphetha imidlalo emihlanu linqotshwa, akula lomlandeli wayo ofisa ukutsho ibizo layo. Kumdlalo odluleyo, i-Arsenal itshaywe enkundleni yayo nge 1-0, yiBurnely iqembu elikhangelelwa phansi kuligi.
Kumidlalo engu-12, i-Arsenal isibuthelele imiklomelo engu-13 kuphela. Ihlezi ikhangele izembe ngoba nxa ingaguqulanga isimo, ingehliswa kuligi ephakemeyo.
Imbali yokudlala kweqembu, ngokutsho kwezazi zomdlalo, iveza ukuba okunje akukaze kubonakale kuminyaka engu-40.
Abalandeli bayo abakoBulawayo batshele UMthunywa ukuthi loba bedanile, bakholwa ukuthi isimo abakuso sizayehlela labanye kumidlalo ezayo.
“Okwenza uPhiri loDube kuyamenza. Yisikhathi esibi esikuso njengemuli ye-Arsenal,” kutsho uMelusi Dumane ohlala elokitshini leCowdray Park.
“Abanye bayasihleka kodwa akuhlekisi. Iqembu ngeqembu lilakho ukuwa livuke futhi. Lokhu kuyaziwa kunguqu.”
UNehemiah Sithole ohlala ePlumtree ubike ukuba usemile ukusekela iqembu.
“Ngizakuba ngumlandeli we-Arsenal nxa ingaphenduka kumfutho wokunqoba, okwamanje kungangcono ngitshiye lokubukela imidlalo yalo.”
ENgilandi lakho kuyafana ngoba abalandeli sebeveze ukucaphuka okuphezulu. Ukhona umdlali othe okwenza ukusekela i-Arsenal kube buhlungu yikuthi isidliwa ngesikhathi le-Covid 19 ivalele ababukeli.
Umqeqetshi waleli iqembu u-Arteta utshele intatheli ngemva kokuyangiswa yi-Burnely ukuthi abadlali bakhe bazaphenduka benqobe.
“Abadlali bami benza kuhle nxa silungiselela imidlalo. Singabe senza amaphutha, sikhutha amathuba kodwa asitatazeli,” kutsho lumqeqetshi okubikwa useduzane lokuxotshwa umsebenzi. — Ubulembu
