uMthunywa
Nkosilathi Sibanda
UKUPHENDUKA kukaThulani Sibanda kuqembu leBulawayo Chiefs kutshintshe umdlalo kodwa lokhe idliwa isiyaphambili.
Iphinde yadlala udaka njalo iChiefs isegumeni layo leLuveve ngokwehluleka ukuphuma lomklomelo idlala leqembu leZPC Kariba lalo ebeliqhula enkundleni.
Nxa isimo saleli iqembu singaqhubeka kanje, kungenzeka ibuyele ezikwakweni zikaDivision One ngendlela engasoze imangalise.
Ngesizini edluleyo iChiefs ibiqethula ezinkulu ezibalisa iHighlanders, FC Platinum, iNgezi Platinum leChicken Inn.
Kulisizini iChiefs isiqethuke kathathu. Inqotshwe 5-0 yiChapungu, yaphenduka ekhaya yadliwa yiTelOne 1-0.
Ekhuluma lentatheli, uSibanda uthe uyazama ukuyilolonga iqembu kodwa amabhola awabonakali emambuleni.Kumdlalo leZPC Kariba, Amakhosi alifikisile ibhola egedini, kwala ukuthi abhoboze inethi.
“Izaphenduka iBulawayo Chiefs. Kumele sizame ukuhlohla. Ngiyazi ukuthi ukuvula kwethu isizini akuthabisi. Sizavuka,” kutsho uSibanda.
Uqhubekele phambili wathi: “Sihlezi kusimo esibi kulogu, ayisikho esikufunayo. Abadlali bayazi ukuthi sifuna imiklomelo ngoba singaphuza ukuyithola, zingabheda.”
Kulimpelaviki Amakhosi angena indlela eqonde kuCaps United. Ukunqoba kulumdlalo kuzavela ekuthini abadlali bakaSibanda abathenjiweyo labo bevuke beqinile.
Kubadlali laba kuloMoses Majika, Farawu Matare, Shepard Mhlanga loNigel Papius.
Abanye abadlali okumele bakhweze isokisi kuChiefs ngunozinti uDavid Bizabantu.
UBizabantu engabe elethalenta kodwa uyekethisa okwedlulisileyo ikakhulu nxa engatshayelwa umvema.
USibanda uzathembela njalo lakuLee Matizirofa, Marlvin Mkolo, Brendon Mpofu, Mengezi Dube, Lucky Ndlela lomagadli uKundishora Chakanyuka.
Kusenjalo kweminye imidlalo iHighlanders inxuswe ngabafana abatsha iMushowani Stars. IChicken Inn idlala leFC Platinum eLuveve. IHwange izangqikilana leManica Diamonds.
Imidlalo yeviki lesihlanu kuCastle Lager
NgoMgqibelo:
-Harare City v Black Rhinos (Rufaro)
-Mushowani v Highlanders (National Sports)
-Chicken Inn v FC Platinum (Luveve)
-ZPC Kariba v Yadah (Nyamunga)
NgeSonto:
-Caps v Bulawayo Chiefs (National Sports)
-Triangle v Chapungu (Gibbo)
-Hwange v Manica Diamonds (Colliery)
-Herentals v Ngezi Platinum (Ruafaro)
-TelOne v Dynamos
