uMthunywa
Nkosilathi Sibanda
BAZONDE bagane unwabu abalandeli beHighlanders ngombala wempahla ezagqokwa ngabadlali kulisizini.
Abalandeli abakhulume lephephandaba likazulu kuliviki bathe i-kit entsha ayihambelani lesiko leqembu njalo yehlisa imuli yeHighlanders isithunzi.
Bathe kwakumele inkampani ethunga impahla le, iRoar, iqale idinge umbono wamalunga, abalandeli lenkokheli zeBosso andubana yenze “amawala”.
Bathatheke bagcwala ngokukhonona ebulenjini abalandeli beTshilamoya, bekhala ngokuthi kusukela ngomnyaka odluleyo, i-kit isithungwa yiRoar, sebebone ukuthi iqembu labo liyadelelwa.
Inkampani yeRoar ihwatshe i-kit yeBosso entsha le emphakathini ngoMvulo ngemva kokuba abasekeli beqembu iNetOne yethule isivumelwano sokuthi izaqhubeka iphosela imali kulisizini.
I-Roar le yiyo futhi ethungela leqembu leCaps United.
Kubalandeli abaxhumane loMthunywa, inengi lithe alifuni lokuligqoka ijesi elitsha.
Bathe i-kit eyayingcono kulazo zonke yileyo eyathungwa yi-Adidas.
“Lokhe ngaqalisa ukulandela iBosso ngo-1987, angikaze ngibone okunje. I-kit le ayenzi bakithi. Iqiniso sibili imbi ukwedlula esadlala ngayo ngo2018,” kutsho uBhekani Dube oseFilabusi.
UNoel Ncube owePlumtree uthe bekungcono inkampani ethungileyo ikhulumisane labathungi bakoBulawayo abazi mhlophe iBosso ukuthi igqoka njani.
“Lapha baphambanisile sibili. Angazi ukuthi kwehluleni ukudinga abathungi esilabo abasekela iBosso.”
UNcube uqhubeke phambili wathi ijesi elitsha leli alisoze lilethe idlabuzane kubadlali labasekeli.
Ukukhonona kwalaba bobabili kugcwaliseke lakuFacebook leTwitter lapho abalandeli beBosso abaphetsheya abayengezelele insolo ngempahla evela kwabe-Roar.
Kusenjalo, uJoel “Josta” Ngodzo umdlali kanobhutshuzwayo oligiqa ekuqembu leCaps United uzakhokhela uhambo lokuza eBarbourfields belande ukuzodlala leHighlanders kumdlalo wesibili weligi yeCastle Lager.
UNgodzo kumasizini ambalwa ekuCaps United, ufike wabayinsika yethimu le.
UNgodzo ngomunye wabadlali beCaps United abasuka kuBosso abaphenduka eMagumeni ukuzongqikilana lethimu ababeyidlalela. Abanye babalisa uValentine Ndaba loGabriel Nyoni.
UNyoni owayedume ngelithi “Granvia” enkundleni, ubikele uMthunywa ukuba kuzakuba nzima ukuthi aphenduke kubasekeli beHighlanders ngeSonto emini.
“Ngiphenduka ekhaya nxa ngiseBarbourfields. Kungabe kuhlabusa kodwa akulula ukuphendukela abantu ababengisekela ngisakuHighlanders. Ibhola linjalo,” kutsho lumdlali.
Umqeqetshi weCaps United uLloyd Chitembwe ukhulume wathi uzathembela kubadlali bobathathu abaphuma kuHighlanders ukuze athole imklomelo yonke.
“Ngibathembile abadlali laba ukuthi badlale ngokuzimisela ngoba bakhulela enkundleni yeBarbourfields. Sifuna ukunqoba,” kutsho lumqeqetshi.
Imidlalo yeviki lesibili kuligi yeCastle Lager:
NgoMgqibelo:
-Ngezi Platinum v Mushowani Stars (Baobab Stadium)
-Bulawayo Chiefs v TelOne (Luveve Stadium)
-ZPC Karibs v Herentals (Nyamhunga Stadium)
-Yadah v Chicken Inn (Rufaro Stadium)
-FC Platinum v Triangle United (Mandava Stadium)
NgeSonto:
-Highlanders v CAPS United (Barbourfields Stadium)
-Dynamos v Hwange (Rufaro Stadium)
-Manica Diamonds v Harare City (Gibbo Stadium)
-Chapungu v Black Rhinos (Mandava Stadium)
