uMthunywa
Nkosilathi Sibanda, Kwavuleka amathuba!
ABADLALI beqembu lamaMighty Warriors sebenikezwe ithuba elitsha lokuzitshengisela enkundleni nanko bazadlala kumncintiswano we-Council of Southern Africa Football Associations (Cosafa) Women’s Championship ngenyanga ezayo.
Ukuphatheka kulumqhudelwano wamazwe kubezindaba ezimnandi ngoba kuza ngemva kokuba iqembu lesizwe lakhutha ithuba elifanayo nyakenye ngenxa yokujeziswa yinhlanganiso yeFIFA elizweni.
AmaMighty Warriors abalelwa kumaqembu aphezulu kulesi isigaba ngoba ayithwala linkezo ngomnyaka ka2011. Iqembu lesizwe libekwe kuGroup C lapho elihlanganiswe khona leLesotho, Namibia kunye leBotswana kulandela ukuqhathwa kwamaqembu ngeviki edluleyo.
Umqhudelwano lo uzadlalelwa eSouth Africa kusukela mhlaka 4 kusiya fika umhlaka 15 Mfumfu.
Kumdlalo wakuqala, iZimbabwe izabe ileLesotho mhlaka 6 Mfumfu.
Abazanqoba ku-Group A kuhlelwe ukuthi bazadlala lamaqembu azaqeda ekunombolo yesibili kwamanye amaqula, kuthi amaqembu amabili aphezulu ku-Group B laku-Group C ahlangane komunye owandulela owokucina.
Umdlalo wokudinga iqembu elizaqeda likunombolo yesibili uzaqhutshwa mhlaka 15 Mfumfu, andubana kudlalwe i-final ngelanga elifanayo.
Kusenjalo, umqeqetshi omutsha wamaMighty Warriors uzamemezelwa loba nini, kusukela kuliviki.
Kulandela ukuqathwa kwamaqembu, iphephandaba likazulu likhulume labanye abalandeli benguqu abaveze imibono etshiyeneyo.
USilenkosi Ndimande ongusomabhizimusi osekela inguqu yabesifazana emalokitshini akoBulawayo ubike ukuba akubuzwa elangeni ukuthi amantombazana adlalela ilizwe kumele asekelwe.
“Ngizwe ngisiba lenjabulo ngokuthi amaMighty Warriors azancintisa kuCosafa. Kwakuhle ke lokhu. Yiso isikhathi sokuthi siphakamise amantombazana adlalela iqembu lesizwe ngoba kade savalelwa phandle, abadlali belahlekelwa ngamathuba.
“Ngifisela iqembu lethu amaMighty Warriors inhlanhla enkulu. Kungumbono wami ngemva kokuhlolisisa wonke amathimu ukuthi iZimbabwe iqinile njalo ilethalenta ukwedlula wonke amazwe akulumqhudelwano.
“Ngokwami ngithi amhlophe ngoba sekuvulekile empilweni zabadlali. Ngikhuthaza inengi lethu elitshisekela ukusekela inguqu yabesifazana ukuthi iqhubekele phambili ngomsebenzi omuhle. Ukusekela umama, yikusekela isizwe,” kutsho uNdimande.
Umkhokheli wenhlelo zokuthuthukisa inguqu yabesifazana uSamukeliso Silengane ukhuthaze abadlali ukuthi basebenzise inkundla zeCosafa, benelise ukuguqula impilo zabo.
USilengane ucele ukuthi amaMighty Warriors anikezwe usekelo njengalokhu okwenziwa kumaqembu esizwe adlalelelwa ngabesilisa.
“Ngemva kwesikhathi sonke lesi sivinjelwe ukudlala, kumincintiswano yamazwe, kumele silungiselele, sitshengise ukuthi besingagoqanga izandla. Awasekelwe amantombazana njalo sikhangelele ukuthi kube losekelo olufana lolunikezwa amaqembu esizwe adlalelwa ngabesilisa,” kutsho uSilengane.
uLee Mangena
Okuzabaluleka ngokuphumelela kwamaMighty Warriors yikukhetha abadlali abasakhulayo, abalethalenta ngokutsho komqondisi weqembu leStreet Set uLee Mangena.
UMangena uthethe isikhathi echaza umbono wakhe mayelana ngemidlalo yakuqala yamaMighty Warriors, lapho abike ukuba iqembu lesizwe lisebunzimeni.
“Ungakhangelisisa isimo somdlalo emazweni esizadlala lawo, kuyavela ukuthi singemuva. Ngesikhathi amazwe la ephakamisa umdlalo, thina sasimile. Yebo kuhle ukuthi sincome ukuthi amaqembu ebencintisa kodwa singalahlekeli iqiniso lokuthi sisalele emuva.
“Kungakhethwa umqeqetshi onguye, kungaba kuhle ukuthi ancediswe kukhethwe abadlali abasakhulayo kodwa abalesiphiwo esikhulu kumdlalo webhola. Banengi abadlali laba njalo kumele ithalenta labo libonakale,” kutsho uMangena.
Amazwe ahlelwe kanje kumqhudelwano weCosafa:
Group A: South Africa, Malawi, Madagascar, Eswatini.
Group B: Zambia, Mozambique, Angola, Comoros.
Group C: Zimbabwe, Namibia, Lesotho, Botswana.
