uMthunywa
Nkosilathi Sibanda
KULINDELEKE ukuthi libesemlonyeni wabantu ibizo likaPrince “Mgadafi” Dube nxa sekumenyezelwa abadlali abazathola isicoco kumkhosi wePremier Soccer League (PSL) ngoLwesihlanu.
Umdlali lo uzabizwa kubadlali abathathu abedlule bonke kulisizini.
Umdlali weHighlanders lo wazibeka emehlweni abathandi bebhola lenyawo ngesikhathi etshaya umambule kumdlalo lapho iBosso isehlula ezinye kuligi yeCastle Lager lakunkezo yeChibuku. Ngenxa kaPrince, iBosso ibethwe intshantshu yeChibuku njalo kukhangelelwe ukuthi iphethe isizini ihlezi kunombolo ehloniphekayo kuligi.
Ukuthola esiphezulu yikho obekufunwa ngumqeqetshi weHighlanders uHendrik Pieter de Jongh.
UPrince ukhangelelwe ukuthi aqakezelwe izandla mhla igama lakhe libizwa. Umdlali lo, ngaphandle kokuqakamisa iBosso, waba yinsika yokuphumelela kweqembu lesizwe amaWarriors. Uqeda isizini etshayele amabhola alethe injabulo kubathandi bebhola labasekeli. Yena labanye abadlali kuHighlanders babe lesandla ekutheni leliqembu licine lingumpetha weligi yeCastle Lager.
IHighlanders iphenduke yabayingozi kwamanye amaqembu kulandela ukuza kuka De Jongh lokuvuka khwatshu kukaPrince labadlali ababalisa uDenzel Khumalo, Peter Muduhwa, Mbongeni Ndlovu, Nqobizitha Masuku loRyan “Ndori Ndori” Lunga.
Ezinye izococo ezizakwethulwa kumkhosi wePSL zibalisa umvuzo kanozinti. Lesi yisicoco esiya kuHighlanders njalo ngoba unozinti uAriel Sibanda uhambe phambili ngokuvimba igedi.
Amanye amabizo azamenyezelwa, yilawo akusicoco sohlohle amabhola amanengi, umdlali osemncinyane owenze kahle, unompembe, lomqeqetshi.
Amabizo abadlali abenze kuhle kuCastle Lager:
Prince Dube, Ariel Sibanda (Highlanders), Joel Ngodzo, Phineas Bamusi (Caps United), Ian Nekati (ZPC Kariba), Evans Katema (Dynamos), King Nadolo (TelOne), Never Tigere (FC Platinum), Ralph Kawondera (Triangle), Wellington Taderera (Black Rhinos), Clive Augusto (Chicken Inn).
