uMthunywa
Silo Mehleli Dube
KUKANENGI kuthi nxa ikhosikazi lingatshiywa ngumkalo kuvele inkulumo efanana lale.
Phela umuntu wadalelwa ukukhuluma amanga leqiniso njalo lapho angani umangoye uyasola umuntu uvame ukuzishwashwata, enganakile ukuthi ulimaza umoya womunye umuntu ngenkulumo yakhe.
Ngithe ngikhangela isibalo samadoda engiwaziyo asebaya kobhekabezayo emveni kokuthatha umhlala phansi sesiqanse kakhulu.
Ngathi ngibuzisisa ikhehla lami uDlomo yena osempunga njalo emkantsho ubomvu wathi isikhathi esinengi kubangelwa yikuthi umuntu angathatha umhlala phansi usuke acabange kakhulu ngezinto ayabe engaphumelelanga ukuzenza esasebenza, azisole acine ezikhokhela imikhuhlane efanana labo BP lesifo senhliziyo.
Omunye umhlabeleli owayedumile wathi kwelinye iculo lakhe “okomhlaba kunengi kakhulu okunye ukutshiya kunjalo”. Omunye uthi nxa esethole imali yomhlala phansi ngoba yona iyabe inengi (lump sum) aswele lokuzibamba aphaphatheke ngeganga, ayidle imali labonondindwa batshaye bayivale nya, athi ethi qaqabu athole engasela mali njalo engathenganga lutho olubambekayo, kube sokuqala ingxabano lekhosikazi ngekhaya ngoba phela abosapho luka Eva lungaqala ukukhuluma ngeke uze ubuquthe,uyabe uhlatshwa uvuswa ngendololwane ukuthi uchaze ukuthi imali uyise ngaphi.
Ngikhumbula enye indoda yayingathenganga inkomo ekusebenzeni kwayo konke phose iminyaka engamatshumi amathathu, yazuza amaqubaquba yathenga inkomo zayo, kwathi ngomnyaka olandelayo kwaba lendlala zacuba inkomo ezilitshumi kwasala eyodwa leguqa layo, yathi inakana ngemali ayeyikhuphile ethenga inkomo wavela wahlaselwa ngumkhuhlane wenhliziyo, wazifela umuntu weNkosi.
Abanye njalo ngabaphiwa imali enlutshwane yinkampani akade eyisebenzela, kukhathaze umuntu ukuthi waqilwa ngemva kokusebenza okweminyaka eminengi kangaka aqale ukudla amathambo engqondo aze ahlaselwe ngumkhuhlane aze azifele, kulapho ozwa khona abantu sebesithi ubulele umkakhe esenzela ukusala ekholisa imali yomhlalaphansi lokungamatshamali kwakhe, athwale nzima umntwana wabantu enyekevulwa bamkhangele ngelihlo lika sport ebona umnikazi wayo ekhukhuza ithambo ledolo lenkomo, ekwazi mhlophe ukuthi ngeke aliqhobe uzalijikelwa.
Kubalulekile ukuthi uzame ngamandla wonke ukufeza izifiso zakho ezinengi usasebenza, ungabona uqala ukwakha umuzi ngemali yomhlala phansi ontanga bathi uyabe usejayivini ngoba uzokhela amalahle ekhanda.
Abanye ngabazondayo nxa sokufika isikhathi sokuthi athathe umhlala phansi ngoba uyabe kade lokhe elibele isikhathi sihamba.-Ayixabene. 0714355641
