uMthunywa
Nkosilathi Sibanda
“KONKE engikwenza enkundleni kungenxa yokusebenza nzima. Ngithanda ukubonga ukusekelwa engilokhe ngikuthola kwabanye abadlali eqenjini. Kuhle ukuhlala usenza okuhle eqenjini. Ngiyethemba njalo ngiyakhuleka ukuthi kuzangifuqa ukuthi ngiqhubekele phambili. Ngifuna ukuhlohla amabhola amanengi.”
Utsho kanje umdlali osegudwini uObriel Chirinda oweBulawayo Chiefs ngemva kokuba esehlohle amabhola alitshumi kumidlalo engu-23 kuligi yeCastle Lager. Umdlali lo, nguye osekhokhela kumbango wesicoco somdlali olamabhola amanengi kuliviki.
UChirinda kuzamele aqinise inyawo zakhe egedini nxa efuna ukuthi aphiwe isicoco sokuhlohla amanengi ekupheleni kwesizini. Ukumbango lo ekhangelele ukuthi adlulise amabhola angu-17 ahlohlwa ngumdlali weCAPS United uWilliam Manondo nyakenye.
Iligi yeCastle Lager
Iphephandaba likazulu lixhumane loChirinda ngemva komdlalo weBulawayo Chiefs leDynamos lapho ahlohle elilodwa. Amakhosi Amahle anqobe nge 2-1.
Umdlali lo usezakhele imbali ngokubalelwa kulabo asebehlohle amabhola amathathu umdlalo owodwa. Wenza lokhu mhla bedlala leTriangle enkundleni yeGibbo. Uthe uzaphinda futhi.
“Ngake ngokutsho isizini iqalisa ukuthi ngizahlosa ukuhlohlwa kuphela. Emdlalweni wenguqu kumele uhlohle nxa ufuna ukunqoba ngakho yikho engikwenzayo,” kutsho uChirinda.
Umdlali lo ulandelwa nguFortune Binzi odlalela iManica Diamonds osehlohle amabhola ayisitshiya galolunye.
Ngesikhathi ejabulela ukuhlohla amabhola alitshumi, Inhlanganiso yeFootballers Union of Zimbabwe inikeze uChirinda isicoco sokuba ngumdlali odlale ukwedlula bonke ngenyanga kaNtulikazi.
Ngaphandle kokuhlohla, umdlali lo sekubonakele ukuthi uyinsika yokufuqwa kwebhola esiswini senkundla, lize lifike ebhokisini likanozinti, okuyikho okwehlula inengi lamaqembu kuligi ephakemeyo.
Uthe ukuphakanyiswa akutholayo akusoze kumkhukhumeze.
“Ngihlezi ngiqaphele ukuthi ngihlose engikulandileyo enkundleni. Izicoco ziqakathekile kodwa iqembu lihamba phambili.
“Ngikhangelele ukuthi ngiyengeze lokhu esengikwenzile ukuze iqembu liqede isizini likunombolo engcono,” nguChirinda lo.
Abanye abadlali asebenikezwe inhlonipho ngemisebenzi yabo bagoqela umdlali weChicken Inn uMichael Charamba loweFC Platinum uWalter Musona.
Ukudlala kuhle kukaChirinda kungabe kuzwisa ubuhlungu inkokheli zeqembu leHighlanders zona ezaqinisa amakhanda, zawomela lemali ngesikhathi umdlali lo efunwa ngumqeqetshi uBaltemar Brito.
Kusenjalo, uChirinda ungena impelaviki ezayo elomfutho ofanayo iqembu lakhe lidibane leYadah enkundleni yeBaobab ngoMgqibelo emini.
