uMthunywa
Nkosilathi Sibanda
UMDLALO wokugijima usufinyelela lakundawo ezisemaphandleni nanko esigabeni seBinga kuzabuthana abantu abedlula ikhulu kumjaho weBinga Kasambabezi Marathon ngenyanga ezayo.
Umjaho lo, ozaqhutshwa mhlaka 29 Mfumfu, enzikini yezitolo zeBinga, uqoqwe kuhloswe ukuthuthukisa amathalenta okugijima lokukhankasela ukuvakatshela indawo ezitshiyeneyo elizweni, kusetshenziswa ezemidlalo. Umncintiswano lo uvunyelwe ngokusemthethweni yinhlanganiso yeNational Athletics Association of Zimbabwe (Naaz) le-Sports and Recreation Commission (SRC).
Isigaba seBinga sithandwa yizivakatshi ezinengi eziyabe zilande umfula uZambezi lokuzwisisa ngembali yesiTonga lokunye okuhlabusayo ngalindawo.
Ngaphandle komdlalo wenguqu, isigaba seBinga asikaze sithole ithuba lokuqoqa imincintiswano yebanga laphezulu. Okwenza umjaho weBinga Kasambabezi Marathon ubemkhulu yikuthi kukhangelelwe ukuba kuncintise osaziwayo lentshantshu kwezokugijima kuleli laphetsheya. Okwakhathesi sekubhalise abantu abedlula amatshumi ayisitshiya galombili ngokutsho kukaRecent Ncube ebikela iphephandaba likazulu.
UNcube uthe loba sekucaca ukuba banengi abantu abafuna ukuncintisa, balokuthaba ukuba izakhamizi zeBinga zithathele phezulu ithuba lokuthi bazitshengisele emdlalweni wokugijima. Uthe kusiyafika umhlaka 17 Mfumfu, bazabe sebemise ukubhaliswa kwabagijimi. “Isiphendukile iBinga Kasambabezi Marathon.
Silokuthaba ukubika ukuba sebebanengi ababike ukuba bazancintisa mhlaka 29 Mfumfu,” nguNcube lo.
“Siqhuba kuhle amalungiselelo.. Okwamanje kulabantu abafika amatshumi ayisitshiya galombili asebebhadale imali yokuncintisa.
Linani elitshengisa ukuba uzakuba mkhulu umjaho lo. Siqoqe imincintiswano kumango we-42km, 21km, 10km le-5km, ngakho manengi amathuba kuwo wonke umuntu.”
Uthe balokukholwa ukuba intshantshu zesiqubu kumango emide lazo zizabuya ngobunengi bazo.
