uMthunywa
Intatheli kaMthunywa
KULOMAMA ongumsekeli weHighlanders owavuka upenyane enkundleni yeBarbourfields wajikijela amapholisa ngesikhathi abalandeli baleliqembu behlamuka mhla iqembu labo linqotshwa yiFC Platinum ngempelaviki.
Umama lo (osemfanekisweni), osedingwa phansi phezulu ngamapholisa akwaziwa ukuthi uvela ngaphi kodwa uyingxenye yezikliwi eziphendulele inkundla yeBarbourfields yabaligceke lezephulamthetho.
Okwenza inina leli liphathwe emlonyeni yikuthi akwandisanga ukuthi kuphume isikliwi sesifazane kubalandeli benguqu. Kuyisiqalo ukuthi inina likhokhele izephulamthetho ezibhidliza umdlalo kanobutshuzwayo.
Ababukeli abazibonela mathupha bayafakaza ukuthi inina leli lalihlezi ngasezansi yenkundla ebizwa ngokuthi yiSoweto. Abafakazi bakutsho ukuba wayedakwe engazazi lumama, kukhanya ukuthi ilanga lakhe angeke limtshonele ngemfanelo.
Kuthe umdlalo usubanga emaphethelweni, kwaqhamuka udlame enkundleni, okwabayikhona inina leli elancedisana lamadoda akhulileyo ukumisa umdlalo ngodlame.
UMthunywa ukhulume labakhankasela amalungelo abomama koBulawayo abathe okwenziwe linina leli kuyayangisa.
USimilo Mhlanga omele amalunga abomama kunhlanganiso yeWomen Leaders Forum uthe:
“Okwenziwe ngumama lo kulihlazo. Thina sithi njengabomama kumele sibengumzekeliso kodwa nxa omunye wethu ebonakala ejikijela amapholisa ebholeni, asazi.”
UBusani Nkomo ongumlandeli weBosso ubike ukuba izikliwi ezifana lomama lo osegudwini zingabanjwa lula nxa kungafakwa amakhamera enkundleni yeBarbourfields.
“Akufakwe ama-CCTV enkundleni yonke ngoba azaveza lapho okuvele khona umsindo. Amapholisa awahlale phakathi kwabantu, azahle acitshe eminye imsindo isasungula, abanengi bengakangeneli.”
UMpilo Dube uthe okungaqeda udlame yikuthi isizwe sibambane.
“Singatsho lokhu lalokhu kodwa asitshiyeni ukukhethana lobandlululo. Kumele sibambane njengesizwe ukuze sibelengqubekela phambili.”
Iphephandaba likazulu lixhumane lomgcinisihlalo weqembu uKenneth Mhlophe obike ukuba abasazi ukuthi bacatshe ngaphi ngemva kokuyangiswa ngabasekeli beqembu, ikakhulu ihlazo lokujikijela amapholisa elenziwe linina leli.
“Siyangekile. Kukangaki sikhuza kodwa abantu bakithi abalaleli. Sithi phansi ngodlame. Umdlalo wethu akumelenga uphethe ngalindlela,” kutsho uMhlophe.
Kusenjalo, kungumbono wabanye ababukeli bomdlalo weBosso leFC Platinum ukuthi kusegcekeni ukuba amapholisa eZimbabwe Republic Police labalandeli beHighlanders yingwe lenja.
“Kodwa-ke, ukuziphatha kwamapholisa siyakuncoma ngoba abazange bakhethe ukuhlasela. Aluba abalandeli beBosso bayahlonipha amapholisa lokuthi njengabantu kumele sihloniphane ngabe umdlalo wethu uphezulu.
“Abalandeli beHighlanders abazihluphi ngokuthi sebephosele ithimu yabo emalahleni ngokwenza udlame,” kutsho uKelibone Msingang osekela inguqu ohlala elokitshini laseMbundane.
Kusenjalo, Isikhulumi sePremier Soccer League uKudzai Bare uthe ngenxa yodlame olwenziwe linina leBosso labanye, iBosso izakhupha inhlawulo yezigidi zamadola.
