uMthunywa
UMQEQETSHI weLamontville Golden Arrows uSteve Komphela ubika ukuba uzadanela kubadlali bakhe abenza kuhle ababalisa uKnox Mutizwa nxa ezacabanga ukuqeda isizini ebalwa lamaqembu aku-Top 8 lokuhamba ibanga elide kuNedbank Cup.
Lo ngumbono ovele ngemva kokukhangela abadlali bakhe ukuthi balawo yini umdladla wokunqoba kodwa isikhathi asisekho njengoba isizini isisiya emaphethelweni.
Selokhu efikile kuBafana Bes’thende, uKomphela, iqembu uselenze latshintsha kakhulu. Loba lingayinqobi imidlalo kodwa lilokhu liqoqa njalo imiklomelo emqoka ikakhulu nxa idlala ekuhambeni. Ngaphandle kokudlala kahle ku-ligi, i-Arrows ilokhu ikhona kuNedbank Cup ngoba izadibana leBloemfontein Celtic kusigaba sama-quarter final.
I-Arrows idlalela eduze leTop 8 okwenza uKomphela angakufihli ukuthi abadlali bakhe abathenjiweyo kufanele bahloniphe wonke amaqembu abazadibana lawo.
Uthe sekumele baqale khathesi ukuba lomona wokuhlohla amabhola.
Ku-Nedbank Cup, uthe konke kuhamba kahle ngoba balokhu beqhubeka ngalokho okufanele bakwenze.
“Kusemqoka ukuthi siqale siphume manje. Umdlalo weChippa United besiwukhangele ukuthi singene ngawo kodwa iqiniso yikuthi ithuba likhona. Nxa ukhangela izibalo kulogu ukhangele njalo lezinga labadlali esilabo kufanele kubekhona ukuzethemba ukuthi likhona ithuba lokufeza iphupho le-Top 8 ngesikhathi esifanayo sihambe ibanga elide kuNedbank Cup.”
UKomphela uthe amatasatasa eqinisa abadlali bakhe ngokubatshela ukuthi yena ubona iqembu lingakwenza okufaneleyo lelikufisayo.
“Siya kumdlalo leBloemfontein (Celtic) kuNedbank. Lo ngumdlalo sonke esaziyo ukuthi singawunqoba. Okwami yikuqinisekisa ukuthi labadlali bayakukholwa lokhu engikubonayo.
“Ngingumuntu ohlezi njalo ekhangelele okungcono. Ngitsho ebumnyameni obunjani kufanele sizifundise ukubona ukukhanya. Ayisitshiyagalombili kuphela amaqembu asele kuNedabank ngakho ke asikho isidingo sokukhangela ukuthi uqhathwe lobani ngoba wonke alapha nje ngoba akulwele futhi kuwafanele ukubalwa layisitshiyagalombili awokucina.
“Kuzosala amane ngemva kwalesi isigaba inhlanhla iyadingeka yebo kodwa ukusebenza kumele kube yikho okuhamba phambili.”
Esesonga uKomphela uthe ukholelwa ekutheni bangakuhlanganisa lokhu bafune i-Top 8 leNedbank ngesikhathi esifanayo.
“Singakwenza kokubili lokhu. Abadlali abebelimele sebebuyile ngakho angiyiboni inkinga ngalapho. Sisesimeni lapho esingazama esifuna ukukwenza. Silwela ukufika kumiklomelo engu-40. Njengoba i-Top 8 kungeye-Absa nje, mhlawumbe nxa sizimisela lakuNedbank singenza okungcono,” utsho kanje sakuncokola uKomphela. — Ubulembu
