uMthunywa
Nkosilathi Sibanda
KUZAKUBA nguMgqibelo obomvu ngempelaviki kudibana iHighlanders leFC Platinum kumdlalo wenkezo yeCastle Challenge Cup.
Zombili zihlangana nje ngoba ziphethe ziyintshantshu yomdlalo kanobhutshuzwayo ngesizini edluleyo. IPure Platinum Play iqede ibelethe inkezo yeligi yeCastle Lager, iBosso yona yaba ngumanqoba weChibuku Super Cup.
Inhlanganiso yePremier Soccer League ikhiphe umbiko wokuba iqembu elizanqoba lizathola i$400 000. Elizadliwa libuyela ekhaya liphethe i$250 000.
Umdlalo wangoMgqibelo lo wembulela inkundla zeligi yeCastle Lager kulisizini ekhangelelwe ukuthi ivulwe ngeviki ezayo mhlaka 21.
Umqeqetshi weHighlanders uMark “Hadebe” Harrison uzangena enkundleni ekhuza kulithimu ayitshiyelwa nguHendrik Pieter de Jongh osekuFC Platinum.
UHarrison uzathembela kubadlali afike wabajikela eqenjini ababalisa uMkhokheli Dube loMichell Katsvairo. UDube usefike watshengisela ukuthi bazawathela emambuleni amabhola encedisana lomgadli kuzwa uPrince Dube.
Lumqeqetshi kakufihli ukuthi abadlali bakoDube laba bazakuba lesandla ekunqobeni kweqembu lakhe.
Ebuzwa liphephandaba likazulu ngokuzimisela kwakhe emdlalweni wenkezo, uHarrison uthe lumdlalo umkhulu.
“Ngiwukhangelele umdlalo. Kuzangitshengisa iqiniso ngokubunjwa kweqembu njalo uzaletha ithuba kubadlali ukuthi bezitshengisele,” kutsho uHarrison.
“Sizakubona ukuthi yikuphi okumele sikwenze ukuze silungiselele imidlalo yeligi ngokupheleleyo. Ngaphandle kwalokhu, sizafuna ukuthatha lumdlalo njengethuba lokuthi sithwale inkezo yakuqala egumeni lethu. Kuzabamnandi ukudlala phambili kwabasekeli bethu esilethemba lokuthi bazagcwalisa inkundla.”
uPrince Dube
Kulumdlalo okhangelelwe ukuthi ubukelwe linengi labasekeli benguqu koBulawayo, umqeqetshi weFC Platinum uDe Jongh uzabe esebangisa inkezo yesibili lokhe waqala ukusebenza kuleli.
Okuzahlabusa ngomdlalo yikuphenduka kwalumqeqetshi enkundleni yeBarbourfields lapho athwala khona inkezo yeChibuku Super ekuHighlanders.
Kungumbono wenengi labasekeli beBosso ukuthi mhla uDe Jongh ekhuza eseBF, kuzadabuka inkundla nanko bambona njengomthengisi.
Umqeqetshi ufike kuBosso wanikezwa ibizo elithi “Hlabangana” masinyane, abasekeli bengazi ukuthi kasoze ahlale eqenjini okwesikhathi eside.
Ukuphuma kwalumqeqetshi kumaphephandaba ebika ukuthi okwakhe leBosso sekwaphela, kungokunye kwezizatho zokuthi azondwe ngabasekeli.
Kuzakubanzima ukuthi lumqeqetshi aphume eBarbourfields engazange athole ukuhlatshelelwa kubi luzhizhi lwabasekeli bakaMantengwane asembona njengesitha.
Isikhulumi seFC Platinum uChido Chizondo ubike ukuba umango wokuza koBulawayo uzakuba lula ngoba balethemba lokuphenduka eZvishavane behlekelela.
“Lo ngumdlalo omkhulu kithi. Inkezo yeCastle Challenge Cup sayithwala ngomnyaka odluleyo ngakho sifuna ukuphenduka layo futhi.”
Iphephandaba likazulu lixoxe labasekeli abazibiza ngokuthi ngabasekeli beBosso okwegazi, abathe bakhangelele ukuthi iCastle Challenge izakuba ngumdlalo omkhulu kulawo wonke.
UKeith Nyathi osekela iBosso evela eNyathi mihla yonke, ulokukholwa ukuthi uDe Jongh kasoze anqobe kumdlalo owodwa eMagumeni.
“Ukusitshiya akwenzayo umqeqetshi lo kuzenza ehluleke ukunqoba kuyo yonke imidlalo eseBarbourfields, iBosso liqembu elidala.”
UNosimilo Mloyi ohlala eMagwegwe uthe: “Sikhangelele umdlalo lo ukuthi ubemnandi. Kudala sacina ukungena eBF sisekela inguqu leqembu lethu. Abasenzele kuhle abafana.” kutsho umlandeli lo.
