uMthunywa
Nkosilathi Sibanda
UMQEQETSHI weHighlanders omutsha uMark Harrison uzangena enkundleni ekhuza kunkezo yeCastle Challenge Cup elwisana loHendrik Pieter de Jongh.
ICastle Challenge Cup idibanisa iqembu elibeyintshantshu yeligi lalelo elibe yingqwele yeChibuku Super.
Kulumdlalo okhangelelwe ukuba khona uZibandlela engakapheli, umqeqetshi weFC Platinum uDe Jongh uzabe esebangisa inkezo yesibili lokhe waqala ukusebenza kuleli. Okuzahlabusa ngomdlalo yikuphenduka kwalumqeqetshi enkundleni yeBarbourfields lapho athwala khona inkezo yeChibuku Super ekuHighlanders. Umdlalo lo uzabe ungowakuqala ukuthi uDe Jongh aphathe intambo kuzimbamgodi.
Kungumbono wenengi labasekeli beBosso ukuthi mhla uDe Jongh ekhuza eseBF, kuzadabuka inkundla nanko bambona njengomthengisi.
Umqeqetshi ufike kuBosso wanikezwa ibizo elithi “Hlabangana” masinyane, abasekeli bengazi ukuthi akasoke ahlale eqenjini okwesikhathi eside.
Ukuphuma kwalumqeqetshi kumaphephandaba ebika ukuthi okwakhe leBosso sekwaphela, kungokunye kwezizatho zokuthi azondwe ngabasekeli.
Kuzakubanzima ukuthi lumqeqetshi aphume eBarbourfields engazange athole ukuhlatshelelwa kubi luzhizhi lwabasekeli bakaMantengwane asembona njengesitha.
Iphephandaba likazulu lixoxe labasekeli abazibiza ngokuthi ngabasekeli beBosso okwegazi, abathe bakhangelele ukuthi iCastle Challenge izakuba ngumdlalo omkhulu kulawo wonke.
“Umqeqetshi lo besimthanda kodwa wasiphoxa sisalinde ukuthi uzabika ukuba silaye lakusizini le. Pho sithini? Inhliziyo ziyephukile. Uzabona ukuthi sizabe sizonde sigane unwabu,” kutsho uJosiah Nkiwane ohlala eMzilikazi.
USabelo Ndlovu osekela iBosso evela eNyathi mihla yonke, ulokukholwa ukuthi uDe Jongh kasoke anqobe lomdlalo owodwa eMagumeni.
“Ukusitshiya akwenzayo umqeqetshi lo kuzenza ehluleke ukunqoba kuyo yonke imidlalo eseBarbourfields, iBosso liqembu elidala.”
IBosso isibike ingesabi ukuthi ifuna ukuthi umqeqetshi wayo omutsha ahle angene ngokuzohluthuna iCastle Challenge ezandleni zePure Platinum Play.
Isikhulumi seBosso uRonald Moyo uthe bakhengelele ukuthi uHarrison afike koBulawayo iviki isiyaphela.
“Kumele sibe laye kumalanga alandelayo, sikhangelele ukuthi aqale uhlelo lokulungiselela isizini yalonyaka.”
