uMthunywa
Ethel Ncube
IPHEPHANDABA likazulu liza lazo ezimnandi ezokuzithokozisa nanko phela lixhumane lomahlekisa ozalwa eZimbabwe osedume kakhulu komakhelwane eMzansi Afrika yena ovezele iphepha leli kabanzi ngomsebenzi wakhe.
Mzansi Afrika
UMthunywa uxoxe lomahlekisa uAljoy Anesu Chikowo owazakala ngebizo lakhe lomsebenzi elithi Chik Aljoy yena owenza umsebenzi wokuhlekisa eseGoli.
Ekhuluma lentatheli uChik Aljoy uveze ekuhlekiseni lapha usebenza lesithandwa sakhe
“Emsebenzini wami wokuhlekisa ngisebenza lesithandwa sami uThando Tshuma, siyizithandani zikamahlekisa.
“Ngananzelela ukuthi sisebenzisana kuhle lesithandwa sami uThando Tshuma laye ulesipho esifana lesami.
“Ukuze ngiqale lumsebenzi ngaqala ngokubukela amavidiyo kuYouTube ngibukela lemisebenzi yabanye abanengi omahlekisa asebaphumelelayo ngananzelela ukuba yinto engingayenza khepha isipho ngilaso ngasiphiwa nguMdali,” utsho njalo.
Uthe ngaphandle kokuhlekisa uzulu benza ama-skit lokunye okutshiyeneyo okufana lama-street quiz athokozisa abantu ngendlela emangalisayo.
Uqhubekele phambili waveza ukuthi sowathola izicoco ezithile ngokwenza lumsebenzi.
“Lokhe ngaqala umsebenzi wami sengakhethwa kanengi eMzansi Afrika ekutholeni izicoco kukanti lasekhaya lapho engivela khona sengake ngathola isicoco kuBulawayo Arts Awards okutshengisa ukuba umsebenzi wami lasekhaya bayawuncoma njalo bayawuthakazelela lokhu lami kungipha amandla okuqhubekela phambili.
Uthe zinengi inhlelo azihlelileyo ezizakwenza umsebenzi wakhe ukhule njalo wazakale kundawana
zonke njalo lonyaka uthe ukhangelele ukuzokwenza umdlalo kamahlekisa ekhaya eZimbabwe.
“Ngiyabonga njalo kubalandeli bami abangilandelayo ngithi lingadinwa umsebenzi uyaphambili labasekhaya eZimbabwe ngiyeza maduzane ngizolijabulisa mathupha,” kuphetha uAljoy.
