uMthunywa
Ethel Ncube
ININA eliyisizalwane seMalawi elandise ukuvakatshelwa ngabanengi kumbukiso weZimbabwe International Trade Fair seliveze ukuthi lonyaka lizoqinisa ngamandla imizi.
Inina leli, uNkosikazi Lucy Phiri uthe ubuye lemithi yesintu yabomama labobaba ukuze imizi ingachitheki.
Ngesikhathi intatheli ifika lapho okubukise khona uNkkz Phiri inanzelele ukuba obaba abanengi bebephuma bethwele imithi etshiyeneyo besithi bafuna ukuyaqinisa imizi yabo.
Ekhuluma lentatheli omunye wabobaba othenge imithi le uveze ukuba yena minyaka yonke kayekeli ukuyathenga imithi le ngoba uyayithemba.
“Mina kubomama beMalawi angekeli ukuyafika. Imithi yabo iyaqinisa iqolo, ungayinatha iqolo liyaqina nko ubuyele ube lijaha.
“Kumdlalo wocansi uvuka khwatshu, lonyaka babuye lonamunede oyabe uzinathela nje uqinisa umzimba wonke,” kubika ubaba lo.
UMthunywa ukhulumisane lenina elize lemithi yesintu yeMalawi uNkkz Phiri othe akukho angelakho okudingwa ngabatshadileyo.
“Umbukiso weZITF ungihlanganisa labantu abanengi. Lonyaka ngibuye lemithi yokuzoqinisa imizi yabathetheneyo. Kulomuthi oyimpuphu owabomama owokubopha ngaphansi uphenduke ube yintombi nto. Umuthi lo wenza futhi ubaba adlalele duze langekhaya.
“Ngiphinde ngibe lowabobaba owokuthi labo benelise ukusuthisa omkabo, lowu-ke wona ungumtshina. Bomama labobaba sondelani lizothola imithi le liqinise imizi yenu.
“Ngibuya lapha kanye ngomnyaka kumbukiso wonalo weZITF kungakho ungalala uzasalela, umuzi uchitheke,” kuphetha uNkszn Phiri.
