Uncategorized

Ngize ngambona umfazi otshayindoda!

03 Dec, 2020 - 00:12 0 Views
Ngize ngambona umfazi otshayindoda!

uMthunywa

NGANGIHLALA ngisizwa ukuthi kulabanye omama abaluhlaza njengenyongo yenyathi, ababhaxabula indoda ihlabe umkhosi wewotshi elunywe indlebe yinja elabandlwane.

Sathi sihlezi emini yantambama, umsakazo ngiwuvulele phansi, ngezwa okasapho lukaEva okwensewula elesiqhotho, nxa ngithi mehlo suka ngithole ngumakhelwane wami, umkakhe ekhokhele okomfana othanjisiswa amajongosi.

Njengoba lawe ukwazi ukuthi izindlu zemadolobheni phose zibambane, kwaphuma abadala labancane, kutshaywa imvokloklo, abanye ngabasebeqoqomele ngamajurawolu bezibukelela ibhayisikopo yamahala.

Umakhelwane wami wayezama ukubalekela enkambeni eyayibucwadlana nje lendlu yakhe, kodwa wabanjwa engakafiki ndawo, zanetha izibhakela.

UMagutshwa wayetshaya isibhakela hatshi mbijana kwahle kwangicacela ukuba lumama welusa.

Wayemtshaya aze aphumisele athi udla imali yomholo labonondindwa bakho wena ubona ukuthi ilizwe lime ngenyawo imikhuhlane ibhahile uze ungasela lutho usuzihambela nje. Wathi ukuphunyuka ngentuba yenalithi wagijima wayafika enkambeni, ubazi lawe abantu bedolobheni bathi emuva labathengisayo bake bakhohlwa ngakho okwemizuzwana.

Engena enkambeni umlomo usubomvu gebhu ngegazi okomzukulu ozipikle ngejamu ebuye lomalume evela eGoli, indebe phela zazicacambile okwesidaka esitshiswe lilanga.

Lapho ayethi uzathola khona usizo wathola inengi kulamapholisa awesintwana, elandisa udaba lwakhe bahleka babulawa zimbambo baveza lezilakalaka, bathi ababuyele bayoxoxisana, wezwakala ecela ukuthi umkakhe afakwe insimbi ngoba esesaba ukuthi uzamlimaza.

Kwathi ukufika kukaMfundisi webandla laboMagutshwa yikho ukudeda kwelangabi wahamba labo ngekhaya.
Ayixabene.- 0714355641.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds