uMthunywa
Nkosilathi Sibanda
ULOKHE etshaya inja efihla umphini umqeqetshi wamaWarriors uZdravko Logarusic, njengoba uyala ukuthi wavoxa udaka kumkhankaso wenkezo yeCosafa.
Umqeqetshi lo, odume ngelithi “Loga” uphume kumabonakude we-ZTN ebika ukuba bonke abamsolayo bazabona ukuthi uyingcitshi kuzwa ngenyanga kaMpandula lapho ama-Warriors azahlasela khona kumkhankaso wokuyadlala ku-World Cup.
Kumidlalo le, isizwe seZimbabwe sizadlala le-South Africa le-Ethiopia kumdlalo yamaqoqo kudingwa abazancintisana.
ULoga, odabuka kwele-Croatia sewanqoba kumdlalo owodwa phakathi kwelitshumi lambili aseyikhokhele.
Uthe uzabachumisa bonke abamsolayo.
“Ngibiza futhi ngoMpandula sikhulume. Bonke abathi uLoga akulalutho ngizabachumisa,” kutsho umqeqetshi lo.
“Wabizeni wonke amaqembu lizobona. Ngizabe sengiliphekile iqembu. Abadlali engibathembileyo ngaleso isikhathi bazabe sebeqinile ngokuhlala belolonga lamaqembu abo. Ngizalitshengisa.
“Ngingumqeqetshi okhangelele elakusasa. Iqembu lama-Warriors lidinga abadlali abasacathula. Abasakhulayo yibo ikusasa yamaWarriors.”
Kusenjalo, iphephandaba likazulu lithole udletshana lokuthi inhlanganiso yeZifa ayisoke imxotshe uLoga.
Lokhu kuza ngemva kokuba abalandeli bomdlalo bekhalaze ngokuthi lumqeqetshi akalampumela ejabulisayo.
“Abaphathi beZifa bavumelana ukuthi bamgcine uLoga. Ngitsho laye umongameli uFelton Kamambo ucabanga akufanayo,” kutsho isisebenzi seZifa esiseduzane lodaba.
– @NkosieLegend
