Ethel Ncube
UMHLABELELI odumileyo ophuma koBulawayo uJeys Marabini uveze ukuba uzajabulisa omama ngelanga labo i-Mother’s Day ngempelaviki emcimbini ozakwenzelwa eKillarney.
Ekhuluma lentatheli uJeys Marabini uchaze ukuba ilanga labomama lilanga elikhulu njalo eliqakathekileyo kakhulu.
“Ilanga labomama lilanga elikhulu njalo eliqakathekileyo ngoba sinje kungenxa yabomama. Umhlaba umile nje kungenxa yabomama.
Jeys Marabini
Emcimbini wabo ngizabaphathela uluju lodwa, bazazijabulela kakhulu ingoma zami. Ngibathembisa okuhle kodwa ngelanga labo,” kuveza uJeys.
Uqhubekele phambili wachaza ukuba omama ngabantu abaqakatheke kakhulu.
“Mina omama ngiyabahlonipha njalo ngiyabaphakamisa kakhulu ngoba konke kusukela kubo. Sizalwa ngomama sikhuliswe, siphinde sigcinwe yibo. Ilanga leli liyisibusiso, kumele silinanze. Omama zimbokodo, kumele sibathande sibahloniphe,” kuphetha uJeys.