Uncategorized

‘Ngiyatshada lodadewethu noma kanjani’

22 Aug, 2019 - 00:08 0 Views
‘Ngiyatshada lodadewethu noma kanjani’

uMthunywa

Gladmore Ncube

KULEJAHA leWest Acre eliqina ngamazwi asethuse abanengi awokuthi liyamthatha udadewabo ngoba basuka kude ngothando lwabo.
Kubikwa ukuthi uMnumzana Mkhululi Mthembu uthi yena akulanto engama phambi kothando lwakhe lodadewabo uNkosazana Shantell Nyoni.

Linsindabaphenduli izwakale ngeviki edluleyo lapho intatheli ekhulumisane khona loMnumzana Thabiso Ndlovu obikele iphephandaba likazulu ukuthi udaba lolu luliqiniso ngoba vele laba bobabili bavele bayahlanyisana.
“Abadala babeqinisile nxa bethi okulempondo akufihlwa emgodleni nanko phela uthando lwabo laba bobabili baqala belufihla kodwa khathesi seluthe bhadla emehlweni ethu sonke.

“Yiloba lingazalwa lonke ngokwenyama akutsho ukuthi selingathandana, lina seliyizelamani ngokuthathana kwabazali benu. Laba bobabili bahlala bonke iminyaka engafika itshumi lambili kodwa bekhuliswa njengezelamani singazi ukuthi bona bazicabangela umuzi wabo.

“Udaba lwabo luthe luphuma lwethusa kakhulu njalo uyise walaba bantwana kazange akuthande lokhu wamxotsha umntanakhe ekhaya basuka bonke balandelana baya koBulawayo. Lokhu yikho okwenze kwaba sobala ukuthi ngempela laba bobabili bayathandana,”kuchaza uMnu Ndlovu.
Intatheli ikhulumisane njalo loMnu Albert Mthembu uyise walaba bantwana othe lokhu okwenziwa ngabantwabakhe kubangelwa ngamadimoni.

“Lokhu yimimoya yamadimoni ehlasele abantwabami, kumele baye ebantwini kumbe ngibase ebantwini abaphurofethayo ukuze babakhuphe lawa amadimoni amabi abahlaseleyo.

“Kambe sibili umkami owabhubhayo uyakuzwa njani lapho alele khona nxa indodakazi yakhe engumntanami siphenduke yaba ngumalukazana wami.

“Hayi mina ngeke ngilivume ihlazo elinje yikho nje ngicabanga ukuthi ngibalandele koBulawayo lapho ababalekele khona ngibahambise kubosiyazi babakuphe amadimoni la afuna ukubenza umfazi lendoda,” kuchaza uMnu Mthembu.

Intatheli ikhulumisane njalo loMnu Mthembu ofuna ukuthatha udadewabo obikele iphephandaba ukuthi yena kasoze ayekele ukumthatha udadewabo ngoba baqala ukuthandana abazali bengakathandani.

“Mina ngiyamthanda umuntu wami njalo ngaqala ukuthandana laye kudala sisesesikolo ubaba engakathathi umama wakhe kungakho-ke angiboni sizatho sokuthi sehlukane ngoba thina into yethu ayiveli lapha.

“Angiboni ukuthi ngephula umthetho ngoba vele saqala ukuthandana kudala singakahlali sonke ngakho-ke abadala ngokusihlalisa sonke basenzela kwaba lula ngoba thina sasivele sithandana bona bengakathandani,” kutsho uMnu Mthembu.

Imizamo yokukhulumisana loNkszn Moyo yehlule ngoba umnewabo ofuna ukuba yindoda yakhe uthe akula azakutsho.

Intatheli ikhulumisane loMnu Phathisa Nyathi ojulileyo ngezamasiko othe lokhu ukuthi umuntu athathe udadewabo amenze unkosikazi esintwini kuyibutshapha.
“Ngaze lingazalwa lonke akutsho ukuthi kumele uthi uyamthatha udadewenu ngoba ukuthathana kwabazali benu kutsho ukuthi ngokwesikoseliyizelamani.

“Yiloba ungamthatha udadewenu sungakwenza ngenkani zakho kodwa lokhu kuyabe kungabusisekanga esintwini,” kuphetha uMnu Nyathi.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds