uMthunywa
Nkosilathi Sibanda
UNJABULO “Popo” Nyoni owayengunozinti weqembu leHighlanders uselandule imbiko yokuthi usedlule emhlabeni.
Kusukela ngoLwesibili ntambama, inkundla zokuxhumana besezigcwele amahemuhemu abika ukuthi uNyoni utshaywe, wabulawa esitaladeni kweleSouth Africa. Ngenxa yodumo alalo njengosaziwayo, umbiko lo usabalale kakhulu, okuyikho okuthinte inengi labalandeli bomdlalo wenguqu labeHighlanders.
Kuvele ukuba umuntu owedlule emhlabeni ulebizo elifanayo njalo udabuka koBulawayo.
Ngokuzwa ukuba abantu sebekholwe ukuthi usengumuyi, umdlalo wenguqu lo uthumele abangane bakhe umlayezo weWhatsApp ebika ukuthi usaphila.
“Kanti bathini laba. Ngiyafa ngibulawa yini?” kubuza uNyoni.
Uthumele umbiko lo esebenzisa umakhalekhukhwini womunye umngane wakhe. UMthunywa uzwe ukuba umdlali lo akalafoni.
“Angilafoni nje kuphela. Tshela ugogo engakhathazeki . . . ,” kutsho uNyoni.
Intatheli ixhumane labanye abangane bakaNyoni koBulawayo, abadlala laye esasekuChicken Inn lakuBosso, ababike ukuba uNyoni wayenyamalele.
“Wasuka la ahlala khona wanyamalala okwamalanga amabili. Akwaziwa ukuthi wayengaphi. Kuthe esedingwa, kwavela ukuba kulendoda yaseZimbabwe ethiwa nguNjabulo Nyoni ebuleweyo,” kubika umngane kaNjabulo lo, owayedlala laye kuHighlanders.
Omunye okhulume lentatheli uthe lakhathesi abalankani.
“Asikamboni, ngakho asikholwa ukuthi uyaphila. Sizwile umlayezo wakhe kuWhatsApp, sakhuluma labaseduzane kwakhe bathi uyaphila. Pho kuyini obekusenzakala?”
UNyoni wayeyinsika yamaqembu eChicken Inn leHighlanders ngesikhathi esatshisa emdlalweni. Wayekhangelelwe ukuthi aqakame abengumqeqetshi ozalolonga abanye onozinti.
Loba inengi kumuli yenguqu lalingamthakazeleli, uNyoni ubalelwa kubonozinti ababelethalenta.
