uMthunywa
YiNtatheli kaMthunywa
KULENDODA esakhulayo ehlala ku Unit L eChitungwiza ezithi iliSatanist okumenza abe ‘lamandla” okubangela ingozi zomgwaqo.
Lanxa uAbednico Heri (24) ehluleke ukutshela intatheli ukuthi yena labangane bakhe batholani ngokubangela ingozi uthe amaSatanist ayanatha igazi labantu kanye lokwenza okunye okungazwisisekiyo.
“Mina labanye bami siyabangela ezinye ingozi zemgwaqweni. Ngimane nje ngizwe kusithi sokumele kwenzakale, kodwa ngeke ngichaze ukuthi sikwenza njani lokhu,” utshonjalo uHeri.
“Kwamanye amahlandla ngiyaphupha ukuthi ingozi sokumele yenzakale nxa ngiphaphama ngizwe sokulembiko yokuba endaweni ethile sokube lengozi kwafa abantu.
“Kwesinye isikhathi ngiyezwa ilizwi lisithi sokulengozi okumele yenzakale emoteni loba ebhasini engiyabe ngiphakathi kwayo. Ngisiza khonapha ngivela koBulawayo, ngehlele endleleni ibhasi sengisizwa ukuthi sokuzakuba lengozi. Ngisanda kwehla ibhasi, umtshayeli uhle wehluleka ukubamba imiqobotsho yabhewuka,” kulandisa uHeri engela ngitsho nhloni.
Uthe kwezinye izikhathi ingozi lezi ziyenzakala ephakathi kwebhasi loba imota kodwa yena aphunyuke engelanxeba.
Okuyikho okumenza akhulume indaba yakhe undoda lo uthi kasafuni kuba liSatanist.
“Kangisafuni, abanye bami bayangisebenzisa kakhulu. Abathathu bakhona bayangibhinya. Izihlobo zami sezikwazi kungakho kazisangithandi.”
UHeri uthi wangena kuSatanism ngemva kokuhlangana lenye indoda yeKwekwe ngo 2012 eyayitshayela imota emnyama yomhlobo weBMW eyayilamafasitela angakhanyi okuphakathi yena owambuza indlela.
“Ngagada imota yakhe wangipha i-ring kanye le-necklace okucazimulayo. Kodwa ngaphinda ngalahlekelwa ngumkhumbulo ngiphakathi kwemota. Sengibuyele ngekhaya, i-ring kanye le-necklace engipha khona kwaphenduka kwaba lixoxo lenyoka,” utshonjalo.
UHeri uthe kazange abe yingxenye yeSatanism ngokuthanda, kodwa wamane wangeniswa kuyo. Uthe lanxa engasafuni ukuba yingxenye yayo kodwa useseliSatanist eligcweleyo yikho nje edinga usizo.
“Undoda lo wafika ebuza indlela eya eMbizo. Ngangena emoteni yakhe lapho engafika ngalahlekelwa ngumkhumbulo ngaze ngaphaphama nginqunu njalo ilanga selisiyatshona. Ngambuza ukuthi ngenzenjani wathi ngithule,” utshonjalo uHeri.
Uthe undoda lo wazithi unguLaiton.
Uqhubekele phambili wathi undoda lo watshayela imota waya laye edolobheni leKwekwe lapho afika wamthengela ezinye impahla kodwa ezakhe ayezigqokile kakwazi ukuthi zayangaphi.
“Ngagqoka impahla engazithengelwayo kodwa ezami kangizange ngiphinde ngizibone futhi kuze kube lamhlanje. Wangibisela lapho ayengithethe khona.
“Ngangihlangane laye ngehola lesibili emini wayangitshiya ngehola lika 6 ntambama. Ngafika ngekhaya ngehola lika 7 ngabuzwa ngabazali bami ukuthi ngivela ngaphi kodwa ngenxa yomoya owawusuphakahi kwami, ngaqala ukubathethisa,” utshonjalo.
UHeri — obekhanya ephile kuhle engqondweni ngendlela alandisa ngayo indaba yakhe — uthe lanxa wayengazange anike indoda le inombolo zakhe zocingo, wamangala esemtshayela embingelela.
Uthe undoda lo waqala ukumvakatshela emnika imali emthengela lokudla.
“Abazali bami babengakwazi konke lokhu ngoba undoda lo wayengathi ngumuntu engizwana laye. Waqala ukungikhombisa lanxa ngingowesilisa kodwa mina ngisala. Ngelinye ilanga wabuya legabha elilamaqanda amathathu wawabulala kuyi-yolk yodwa ngesikhathi elabangane bakhe abathathu abayiziqhwaga zamadoda abangibamba ngamandla ukuthi nginathe amaqanda la eluhlaza. Kusukela lapho ngaqala ukulandela lokwenza konke abakufunayo,” utshonjalo.
UHeri uqhubekele phambili esithi: “Enye indaba emethusayo yikuthi indoda le, ile-spider esikhulu esihlala sinamathele emhlane wayo esihamba simudla umzimba wonke. Ungasibona ungacabanga ukuthi yi-tattoo, ulesilonda emphinjeni esitshonayo lapho okungena khona i-spider sisiyakudla inyama yakhe kanye lamathumbu akhe njengokutsho kwakhe, kubikwa njalo ukuthi siyamunya igazi lakhe.
Uthe undoda lo wayehlala emnika imali kodwa yonke yayinyamalala. UHeri uthe wathi ebuza ngokunyamalala kwemali ayemnika yona, wathi kumele ayisebenzise iphele ngosuku ayabe emnike ngalo.
“Ngokuhamba kwesikhathi, undoda lo wangifonela esithi ngizakuzwa izinto ezimangalisayo. Ngezwa omangoye ababekhala kumakhalekhukhwini wakhe ngesikhathi engitshayele ucingo, andubana athi yikho lapho okuvela khona imali ayengipha yona.
“Ngathi ngisiya kubaphurofethi bangitshela ukuthi ngangeniswa kuSatanism. Ngakhulekelwa ngatshelwa ukuthi ngilahle iring kanye le-necklace le, ngakufaka esambuzini ngavulela amanzi,” utshonjalo.
Uthe eselahle izinto lezi umnikazi wazo wambuza ukuthi uzise ngaphi wasesithi uyazifuna.
“Umnikazi wezinto lezi wathi nxa zingekho ngimnike amabizo abantwana bakamama ababili, lezithombe zabo kodwa angikakwenzi lokhu. Wathi kumele kuthi kusiyafika umhlaka 5 Nhlolanja sengilethile izinto zakhe. Ngiyesaba ukumnika amabizo abantwana bakamama kodwa i-ring le-necklace yakhe kangiselakho njalo ngeke ngikuthole. Sengifisa lokuzibulala ngoba ngihlala ngibona amaxoxo lenyoka ezinengi,” kulandisa uHeri.
UHeri uthe undoda lo owamngenisa iSatanism uyafika ngakibo ambhinye elamanye amadoda amathathu.
Uthe undoda lo uyamfonela emtshela lapho akhona lakwenzayo okuyinto emangalisayo.
UHeri uthi wacina ukubonana londoda longoMgqibelo ngeviki ephelileyo koBulawayo lapho ayencediswa khona ngomunye umphurofethi.
Labo abafisa ukuncedisa undoda lo bangamthinta kunombolo ezithi 0786 613 658 loba ku 0772 422 253.
