OWESIFAZANA osebenza ukuthengisa umzimba eMutare uphumele egcekeni ukuthi wonke amadoda ayethandana lawo wayewazalela abantwana ngenhloso yokubhidliza imizi yabo.
UNetsai Chikunu (36), lo olabantwana abangu-5 lamadoda ehlukeneyo, uthe ngesikhathi eqalisa ukuthengisa umzimba, wayesenza engathi uledimoni.
Uthe amadoda onke ayethandana lawo wayesiba labantwana lawo kodwa abantwana bakhona engabi lendaba lokubanakekela ngoba imali yonke ayeyithola ekuthengiseni umzimba wayeyiqedela etshwaleni.
Phezu kwalokho, uChikunu uthi wayesenza angathi uyafikelwa ngoba wayehlala esilwa lamadoda la lamakhosikazi awo. Kodwa khathesi, inina leli lithi liyazisola ngenzondo ayeyitshengisa abantwabakhe okumenza anakanele ukuba ngeke bamxolela ngolunya ayebenzela lona.
“Ngingumuntu owakhula impilo ingemnandi okokuthi umsebenzi ebengiwenza owokuthengisa umzimba, ngangifuna ukubhidliza imizi yabantu ngoba yonke indoda engangithandana layo ngangiyizalela umntwana. Ngilabantwana abahlanu bonke balabobaba abatshiyeneyo.
“Ngingakhangela abantwabami khathesi, inhliziyo yami ibabuhlungu kakhulu ngoba ngangibenzela ulunya ngingabagcini ngendlela. Imali yonke engangiyithola ngangiyiqedela etshwaleni ngingathengeli abantwabami ukudla, lokho okokuthi bazadlani ngangingela ndaba lakho.
“Kodwa khathesi ngenelisile ukutshintsha impilo yami, angisakwenzi engangikwenza okokubhidliza imizi yabantu,” kuchaza inina leli.
UChikunu uthi ngenxa yokuhlala esilwa labantu, kwamenza wasala elamanxeba umzimba wakhe wonke.
“Mina ngingumuntu owayelolaka kakhulu okokuthi ngangingesabi ukulwa, ngangisilwa kakhulu ngilwisana lamakhosikazi abanikazi kumbe amadoda akhona. Lingakhangela ekhanda ngigcwele amanxeba okulwa, ngangingaqalwa,” utsho njalo.
UChikunu uthe wenelise ukuguqula impilo yakhe ngemva kokuqala ukusebenzisana labeqembu leCentre for Sexual Health and HIV/AIDS Research Zimbabwe (CeSHHAR), labo abamfundisa imisebenzi yezandla yokuziphilisa.
Owesifazana lo wafundiswa njalo yinhlanganiso le ukuthi enelise ukufundisa abantwabakhe njalo lokuqakatheka kokuthatha imithi yabo egoqela amaARV (micoplanner).
UChikunu uthi imisebenzi yezandla isitshintshe impilo yakhe lokho okumenze wazibona engena ohlelweni lweqembu leli elamncedisa ukuthi enelise ukugcina imali yakhe waze wenelisa ukuthenga imota.
“Angazi ukuthi abeCeSHHAR ngibabonge ngani ngoba benelisa ukutshintsha impilo yami ukusiphumelelisa ngokusifundisa, mina labanye bami imisebenzi yezandla zethu.
“Silohlelo esilwenzayo olwabo mama olwenhlanganiso lapho esitshayelana khona nyanga zonke. Imali le siyisebenzisa ukwenza inguquko ezitshiyeneyo kumbe ukuthenga impahla yokusebenzisa emisebenzini lokho kwenza sincediseke kakhulu.
“Mina ngokuphakanyiswa yinhlanganiso le, lokuzisebenzela ngezandla zami, ngenelise ukuzithengela imota njalo abantwabami ngibapha abakufunayo. Ngiyazi ukuba kuzangithathela isikhathi eside ukuthi abantwana bami bangixolele kodwa ngizaqhubeka ngiqinisela,” kutsho uChikunu. – Kwayedza