‘Ngifuna ukukhulisa umculo wakoNtuthu’

05 Jul, 2018 - 00:07 0 Views
‘Ngifuna ukukhulisa umculo wakoNtuthu’ UNtokozo Marcus Ngwenya

uMthunywa

IPHEPHANDABA likazulu njengoba lisaziwa ngokujabulisa uzulu ngokulidibanisa labahlabeleli abehlukeneyo, lamhlanje lize lomfana osakhulayo osedumile koMthwakazi ngokucula i-Afro pop. Umhlabeleli lo useke wangena kuTop 20 emsakazweni.

Umhlabeleli lo owaziwa kakhulu ngengoma yakhe ethi Less yayda yada utshengisa ukuba lekusasa elihle emculweni ngokusebenza kanzima. Umhlabeleli lo owaziwa ngokuthi Mr Yada nxa ufuna ukwazi ngaye ngcono nansi ingxoxo ehlabusayo phakathi kwentatheli kaMthunywa uArnold Ndlovu (AN) lomculi uNtokozo Marcus Ngwenya (NMN).

AN: Kunjani jaha lakithi, akutsho ukuthi wena ungubani njalo waziwa ngani koNtuthu.

NMN: Mina ngingumculi ohlala elokitshini leNtumbane owenza imiculo eyehlukeneyo egoqela i-Afro pop, hip-hop le-alternative. Emculweni ngaziwa ngelithi Mr Yada ngaqala ukuhlabela ngomnyaka ka2012, ibizo lami lemiculweni ngalithola ngemva kokuhlabela ingoma yami ngilo Mzoe 7 eyaba lodumo elizweni kukanti elami elokuzalwa nginguNtokozo Marcus Ngwenya.

Ukungena kwezomculo ngaqala ngisebenzisana labanye abahlabeleli siliqembu elalibizwa Young Life kodwa sacina sesehlukene ngahamba ngayahlabelela ngiseSouth Africa lapho engaba lenhlanhla ngoba enye yezingoma zami yenelisa ukuthola indondo yeBest Trap kuma EM Awards.

AN: Njengoba sulesikhathi esingaka emculweni akutshele uMthwakazi Sitshela ukuthi suke wakhipha idlalade yini.

NMN: Okwakhathesi ngisebenza kudlalade lami lakuqala kodwa minyaka yonke bengikhipha izingoma.

Okwenze ngaphuza ukukhipha idlalade lami yikuba bengifuna ukwethulela abantu umsebenzi opheleleyo.

Idlalade lami lizaphuma ngoMfumfu kodwa alikabi lelanga lapho elizakwethulwa ngalo. Idlalade lami leli ngisebenza kilo ngibambisene lePrivate Boys.

AN: Njengomculi akutsho ukuthi bunzima bani osuhlangane labo ekuculeni?

NMN: Ubunzima obukhona yikuthi koBulawayo balutshwana abasekeli labalandeli bentsha esakhulayo emculweni, ezikhathini ezinengi siyabambisana njengentsha esakhula ukuthi sivuselele umculo wakoBulawayo, olunye uhlupho zindaba zemali ngoba kwesinye isikhathi asibhadalwa nxa bengasinxusa emcimbini kumbe sibhadalwe imali engenelanga.

AN: Eminyakeni emihlanu ezayo uzibona ungaphi Sitshela?

NMN: Mina ekuculeni lapha eminyakeni ezayo ngikhangelele ukukhula njengomhlabeleli ngiphinde ngikhulise abanye abahlabeleli okungumsebenzi esengiqalile ukuwenza khathesi ngoba ngihlanganisa imicimbi yabahlabeleli ngaphansi kwebizo elithi Kasi Combo. Imisebenzi yeKasi Combo ngincedisana lo Nkosi Kay loMalaika njalo siyenza imicimbi yabahlabeleli abasakhulayo emalokitshini atshiyeneyo koBulawayo.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds