uMthunywa
YiNtatheli kaMthunywa
UMQEQETSHI we-Chicken Inn uJoey Antipas ubike ukuba uyazigqaja ngesimo sabadlali bakhe, ikakhulu onozinti asebevimbe kwathi ngci egedini leqembu.
Lokhu kuza ngesikhathi amaGamecocks ebambe zaqina esiqongweni sengalane yeligi yeCastle Lager. Abadlali baka-Antipas bangene umango ngoMgqibelo bafika begenqula iNgezi Platinum ngamabhola amabili eqandeni. Lokhu bekungokwakuqala lokhe zombili zadibana kunkundla zePSL. IChicken Inn yayingakaze idle iNgezi Platinum.
Okujabulise uAntipas yikuqina okuphenduke kumvimbi lakubonozinti bakhe kumidlalo emihlanu edluleyo. Kuyacaca ukuthi umbono kamqeqetshi wokubiza uEnergy Murambadoro uyasebenza ngoba akula iqembu kuPSL elike lazama ukubhoboza iChicken Inn kakula.
Onozinti laba babalisa uDonovan Bernard, Pride Zendera loSam Mafukidze.
Ohamba phambili nguBernard, osephenduke wabayingcino. Usenikezwe inhlonipho yokuba ngumdlali ohlala esedlula bonke kumidlalo eminengi.
AmaGamecocks asenqotshwe kanye yiFC Platinum.
Iphephandaba likazulu likhulume loAntipas kuliviki wabika ukuthi usuthisekile ngabadlali.
“Kubo bonke abadlali, ngithanda ukubabaza umsebenzi wabonozinti. Ngiyabonga sibili ukuthi amabhola ayahlohlwa ngabagadli kodwa angikhohlwa ukuzimisela kwabonozinti,” kutsho uAntipas.
Umbono ka-Antipas usekelwe ngumqeqetshi wabonozinti uMurambadoro.
“Bonke onozinti bethu bebathathu bayancedisana ukulolonga, okuyikhona okwenza loBernard akwazi ukuvimba.
“UBernard usengumdlali oyingcitshi, osejulisise umdlalo wakhe okumangalisayo.”
“Ngiyajabula. Isimo sabadlali siyathokozisa ngoba baqinile. Iqembu lonke likusimo esihle.”
Kusenjalo, umgadli wodumo uBrian Muza usethembise ukuwahlohla emanengi lonyaka.
Intatheli yephephandaba likazulu ixhumane lomdlali lo ngoLwesithathu othe kapheli moya.
“Ngizaqhubekela phambili ngihlohla. Isiqokoqela yikuncedisa iqembu lethu ukuthi linqobe inkezo kulisizini.
