uMthunywa
OKWEMINYAKA engu-16 ubehlala lomnewabo njengomfazi lendoda ngoba bebekholwa ukuthi lokhu kubenza babelemali enengi.
Lokhu bakwenza ngemva kokutshelwa yisangoma ukuthi bangahlala behlangana emacansini bazakuba lemali enengi. Lamuhla umfowabo kasekho emhlabeni njalo udade lo kasazi ukuthi asithole ngaphi isangoma esabanika umuthi lecebo lokunotha.
Inina leli kubikwa ngesikhathi besiyabona isangoma lalileminyaka engu-27 yokuzalwa umnewabo elengu-29.
Inina leli lithe isangoma lesi sabanika umuthi owawusenza umzimba wabo utshise ulangazelele ezokuhlangana kungakho-ke babehlangana maviki onke.
Uthe wayeyifuna imali yikho nje wavuma ukwenza lokhu akutshelwa yisangoma.
Kodwa lamuhla lelinina elidabuka eVilla Lisa indawo ese-Ekurhuleni eSouth Africa selileminyaka yokuzalwa engu-42 njalo kaliselamali.
Inina leli lithe babephila impilo ebutofotofo lomnewabo. Bathenga indlu, baphatheka kwezamabhizimusi njalo imali yayingasohlupho kibo.
Ngemva kokufa komfowabo ngoNhlolanja nyakenye, inotho yabo yaqala ukutshabalala mbijana mbijana njalo sokusele indlu yodwa.
“Okungizwisa ubuhlungu kakhulu yikuthi umnewethu wafa lenotho yethu. Ngifisa ukuthi ngabe sasihlelile ukuthi sisakwenzanjani uma omunye wethu angatshona kodwa cha.”
Uthe isangoma sabatshela ukuthi kumele bahlangane emacansini kanye ngeviki bangakhuthi ngitsho iviki eyodwa. Uthe bona babekujabulela kakhulu lokhu okokuthi basebehlangana nsuku zonke.
“Empilweni yami ngaba lejaha elilodwa qha, kodwa ngithe ngiqala ukuhlangana lomfowethu akusazange kwaba lendingeko yokuthi ngibe lelinye ijaha. Umnewethu wayenginika imali kanye lokungiphatha kuhle njengomfazi.
“Ngiyazi ukuthi lokhu kuyethusa impela kodwa abazali bethu batshona sisebancinyane kungakho kwakumele sondlane thina sodwa.” Uthe useke wazama ukuzibulala ngokunatha amaphilisi.
“Ngaqala ukuzizonda kanye laye wonke umuntu engiphilisana laye. Abantu ngangibazondela ukuthi bangihambisa esibhedlela ngesikhathi ngizama ukuzibulala kodwa ngacina ngisenza isinqumo sokuthi ngilungise impilo yami.”
Inina leli like ladinga isangoma sakuqala kodwa kalisitholanga laselisiya kwesinye njalo isangoma ukuze lithole usizo kodwa kwehlula. “Angifuni ukufa ngingelamali ngihawula. Ngidinga usizo.”
UMnumzana Joseph Dungamanzi ubikele iphephandaba le-Daily Sun ukuthi kakaze ahlangane lensindabaphenduli enje.
“Sengake ngahlangana lazo insindabaphenduli kodwa enje ngiyayiqala qha, angikaze ngizwe ngayo. Angabuya azongibona mhlawumbe ngingamsiza,” kubikwa uMnu Dungamanzi. — Daily Sun
