uMthunywa
Vusumuzi Ndlovu
Abaculi: Hwabaraty featuring Madlela Skhobokhobo
UYABONA ke, uJaphet loMothusi lapha basebenzile mpela! Lapha ngikhuluma ngomtshoko womsebenzi wabo bebambene, “umakhwelintaba” edibene lo “mananka” besethulela amaWhatWhat. Leso-ke yiso isihloko sengoma eyenziwe yiSilwane uHwabaraty, exhaswe nguMadlela Sikhobokhobo.
Umdumo we-fusion okaHwabaraty kulingoma uhlanganisa kakhulu imbaqanga le-AfroPop, odlalwe ngekatali yangempela, hayi elikagetsi.
UHwabaraty ungena edumisa la aphuma khona eNjube, njalo ungena ngenkondlo zakhe ezibabaza ubuciko bakhe bokudlala ngamabala ethi yena uzangena lomculo ngehloka njengoMadlela. Lapho uMadlela ungena ngohleko lwakhe ethi ihloka lizababophisa ngo“Sihuli”, esitsho ngobuphoxo bakhe uMadlela bantu! Uthi labo abafisa ukumbona ewile basakhohlakele ngoba kunengi okubuyayo.
Bathi bona bazidlela imali yama-“Off-note”, okunengi abakulaleli. Kukade besizwa amahemuhemu bethi bahlabela ama-discord. Bathi zonke lezo nkulumo abazingeni, kubo ngama “WhatWhat” nje. Bona bazaqhubeka bezidingela imali yabo, ngapha abomona abaqhubeke besanda ngomlomo.
Sikufisela inhlahla kumcimbi wakho okhona kulimpelaviki. Ungalibali umlobi nxa isiphumile imali yama “Off Note” phela Hwabaraty.
