Nkosilathi Sibanda
AMAQEMBU atshibilika kuligi ephakemeyo kumdlalo wenguqu angena kulimpelaviki kusigaba sakuqala somqhudelwano weChibuku Super Cup.
KoBulawayo kuzangqikilana ezimbili ezingomakhelwane iBulawayo Chiefs leHighlanders enkundleni yeBarbourfields ngeSonto.
Kulumdlalo akubizwa ozwayo ngoba akwaziwa lapho okuzawela khona induku loxakuxaku kuxabana abafana abandise ukunatha sitsha sinye. Loba inengi liwukhangelele lumdlalo, udaba oluhamba phambili yikuthi komakhelwane, iBulawayo Chiefs, kukhona okutshaya amanzi. Kuliviki kuvele ukuba iqembu leBulawayo Chiefs liphezulu kokuguqula ibhentshi labaqeqeqtshi balo, nanko seliqhatshe uJohanisi Nhumwa ukuthi azokwengeza ubungcitshi kubadlali balo, kusele insukwana ukuthi idibane leHighlanders kunkezo yeChibuku Super ngempelaviki.
UNhumwa ubengumqeqetshi weJordan Sinnot, iqembu elidlala kuligi yeZifa Division One kulumhlubulo welizwe. Ukuqhatshwa kwakhe kuza ngesikhathi sekuphele inyanga nje, Amakhosi Amahle eqhatshe uJoseph Sibindi ukuthi athathe indawo kaLizwe Sweswe. Kubikwa iqembu leli selicabange ukuthi lengeze inani labaqeqetshi balo ngoba lihlose ukuthi lenze kahle kumidlalo elandelayo, eyeligi lakumqhudelwano weChibuku Super Cup.
Chibuku-Super-Cup
Akwaziwa ukuthi ngubani ozakukhuza iqembu phakathi kukaSibindi loNhumwa okwakhathesi.
Umbuzo okhona yikuthi iqembu leBulawayo Chiefs lizimisele na ukuthi liqhatshe umqeqetshi ngoba kuyaziwa ukuthi alikhiphi imali.
Ukusilela kwemali kuleliqembu akufihlwa ngoba ziphuma zitshelela indaba zokuthi abadlali badla ingqweqwe lalapho nxa bethe banqoba imidlalo. Ukuza kukaNhumwa kukhangelwe ukuthi kutshayise inkokheli zeChiefs amakhanda ngoba kuyabuzwa ukuthi uzaphiwani lumqeqetshi njalo yiluphi utshintsho oluzakuba khona nanko uSibindi ifike wenza kuhle.
USibindi ufice iqembu liqhula, lisadalala ukuthola imiklomelo. Imidlalo yakhe emibili yakuqala eqhatshiwe, uSibindi wenza kuhle watshaya iCAPS United 2-1, kwathaba lenkokheli zeqembu zisithi sezithole umqeqetshi kuzwa. Qede lapho, uSibindi uyilolonge wayilola iChiefs ngesikhathi inqoba iTriangle ngamabhola amathathu eqandeni.
iBulawayo Chiefs
Ngaphansi kukaSibindi, umdlalo weBulawayo Chiefs ubengumdlali oyedlule bonke ngenyanga kaNtulikazi kuligi yeCastle Lager.
Pho okwakhathesi kungani sekudingwa umqeqetshi ozancedisa ubungcwethi obunje?
Isikhulumi seChiefs, uThulani “Javas” Sibanda ngesikhathi ebuzwa ngalokhu, kazange athande ukuchaza okunengi ngaphandle kokuthi kulindwe isimemezelo sabo. Iphephandaba likazulu likubika ngokugcweleyo ukuba iChiefs isilabaqeqetshi ababili.
Intatheli yephephandaba likazulu yenelise ukuxhumana loSibindi othe owakhe umsebenzi ngowokuqeqetsha.
“Ngisakhona eqenjini njengomqeqetshi. Yiwo umsebenzi wami wokuthi ngilole abadlali beqembu ukuze sithole imiklomelo,” kutsho uSibindi
