uMthunywa
Blessing Moyo
INHLANGANISO ebona ngezokulima eye-Agritex ilimukisa abalimi ngomkhuhlane we-late blight ohlasela amatamatisi ngesikhathi sezulu.
Umkhuhlane we-late blight ubangelwa yikukhunta okuhlala emhlabathini omanzi. Ukukhunta lokhu kuvame kumhlabathi ohlala umanzi sikhathi sonke.
Ekhuluma loMthunywa uNkosazana Treggy Mpofu oyingcitshi kweze-horticulture kunhlanganiso ye-Agritex uthe umkhuhlane we-late blight ubangelwa yibumanzi obunengi emhlabathini ngesikhathi sezulu ngoba izulu liyabe lihlala lisina.
Agritex
Abalimi kufanele baqaphele umkhuhlane lo ukuze benelise ukuthola isivuno esihle.
“Amatamatisi aselomkhuhlane we-late blight abonakala eseguquke amahlamvu aba luthuli. Okunye njalo ubona ngamanzi angathi yisilonda esicina sikhula sisiba lombala oluthuli.
“Itamatisi lalo ngokwalo liyahlaselwa ngumkhuhlane lo oyabe usuphakathi kwesihlahla setamatisi okwenza licine liphenduka umbala lingathi liyoma,” kutsho uNkszn Mpofu.
“Kuqakathekile ukuthi umlimi ahlale ehlola insimu yakhe ukuze abone ukuthi amatamatisi akhe awahlaselwa ngumkhuhlane lo njengoba sesiphakathi kwesikhathi sezulu.
“Okunye njalo okubalulekileyo yikuthi abantu bazi ukuthi akumelanga badle amatamatisi ahlaselwe ngumkhuhlane lo ngoba lemlonyeni liyabe selibaba kumbe njalo selibolile.
Uqhubeke wachaza izindlela zokuvikela amatamatisi ukuba engahlaselwa ngumkhuhlane we-late blight.
“Kulendlela umlimi angazilandela ukuvikela amatamatisi akhe emkhuhlaneni we-late blight. Umlimi kumele asiphune amatamatisi azimilela wodwa, okunye njalo kuqakathekile ukuba uqale uhlolisise inhlanyelo yakho ungakayihlanyeli. Abalimi kumele babone ukuba kabatheleli amatamatisi abo ngama-sprinkler njalo lempahla abayisebenzisa ensimini yamatamatisi kumele ibe ihlanzekile ngoba ingcekeza ingenza umkhuhlane lo umemetheke,” kuphetha uNkszn Mpofu.
