uMthunywa
Thokozile Mbedzi
ABE-VETERINARY Services bakhuthaza abalimi ukuba bananzelele isilinganiso se-urea okumele sifakwe ekudleni kwenkomo abazenzela khona ngoba ingaba yingozi kumpilakahle yezifuyo.
Ngesikhathi lesi abanye abalimi balakho ukuba bazilungisele ukudla kwezifuyo zabo ngakho bangalahlekelwa yizifuyo zabo nxa bengekela ukuqaphela isilinganiso se-urea okumele sifakwe.
Ekhuluma lentatheli kaMthunywa uDokotela wezifuyo, uNdabezihle Mkhwananzi uthe abalimi kumele baqaphele isilinganiso se-urea okumele basifake ekudleni kwenkomo zabo nxa bezilungisela ukudla kwezifuyo zabo.
“I-urea ngenye yamaphulotheni efakwa ekudleni kwenkomo ngoba kungaduli. Kungakho nxa i-urea ingaqala ukufakwa ekudleni kwazo ngesilinganiso esikhulu zona zingakajayeli kucina kusiba yitshefu emzimbeni wezifuyo.
UDkt Mkhwananzi uthe kulabalimi abangenilisi ukuthenga ukudla osokulungisiwe ngoba intengo iphezulu.
“Sithanda ukuxwayisa abalimi abazenzela ukudla ngoba bengenelisi ukuthenga lokho okulungisiweyo ngoba abanye bayabe belamahlanga abo abafisa ukuwahlanganisa le-molasses le Urea kungakho isilinganiso simele sibe ngesiqondileyo nxa besenza lokhe.
“Inkomo eyodwa ngelanga kumele ithole isilinganiso se-60 grams kuphela se-urea kungakho ungabona esakho isilinganiso sesisedlula lesi kutsho ukuthi usunika izifuyo zakho itshefu.
“Nxa ulungisa ukudla kwenkomo zakho loba i-concentrate kumele ubone ukuthi ingxenye ye-urea kulokho kudla iba yi-3 phesenti kuphela,” kuchasisa uDkt Mkhwananzi.
Uphinde waxwayisa abalimi ukuthi imbuzi lezimvu akumelanga ziphiwe ukudla kwenkomo ngoba isilinganiso salokho okuyabe kuhlanganiselwe inkomo siyabe sisikhulu kakhulu okubangela ukuba zibe lomkhuhlane ngokudla lokhu.
Uthe izibonakaliso zokuba inkomo isilomkhuhlane obangelwa yi-urea zikhanya ngemva kwemizuzu engu-30 nje kuphela isanda kuqeda ukudla.
“Inkomo nxa idle i-urea edlula isilinganiso esiqondileyo ese-3 phesenti ihle ikhanye ngemva kwemizuzu engu-30 ngoba iyabe isizwa ubuhlungu esiswini, iqhuqha, iswela amandla, iphefumula nzima, iphuma udenda njalo isikhukhumala isisu. Kumele isifuyo sihle selatshwe masinyane siqala ukutshengisela izibonakaliso lezi njalo ukwelapha kuya ngokuthi idle i-urea engakanani.
“I-vinegar engaba yisilinganiso se-750ml ingahlanganiswa lamanzi angaba yi-750ml kanye le-molasses kuphiwe inkomo enkulu, nxa ingavunywa ngumuthi lo ngemva kwemizuzo engaba ngu-5 kusiya ku-10 isisu siyabe sesibohlile,” kuphetha uDkt Mkhwananzi.
