uMthunywa
Wayne Ncube
INDODA ingawa lamhlanje, kusasa iphinde ivuke!
Amazwi la ahambelana kuhle lomdlali wenguqu uPride “Sjankala” Zireni osephenduke emdlalweni nanko phela usemehlweni eqembu leBulawayo Chiefs.
Umqeqetshi waleliqembu uThulani Sibanda, olendumela yokutshintsha abadlali asebephelelwe ngumphako, ubike ukuba uzazimisela ukuba aphendukise uZireni emfolweni.
Umdlali lo akula ongathandabuza ukuthi ulethalenta elifunwa ngabaqeqetshi benguqu. Kumaviki adluleyo iBulawayo Chiefs yamukele uZireni ngazo zonke izandla njalo ubonakale ekhethwa kuqembu lakuqala kumidlalo wobungane obuphakathi kwaleliqembu le-Casmyn Mine ngempelaviki.
Lakanye uZireni odlala esemuva kwesokudla kumbe esesiswini ujabulise abaqeqetshi lababukeli.
USibanda uthe nxa umdlali lo ezimisele ukuvuselela impilo yakhe kunguqu, uzamncedisa.
“Lo ngumdlali olaziyo ibhola. Nxa esezandleni zami uzaguquka kuphela. Ithalenta lakhe liyabonakala,” kutsho umqeqetshi ngemva kokunqoba iCasmyn ngamabhola amathathu eqandeni.
UZireni udlalele isizwe kuqembu lama-Young Warriors, amaUnder-17 le-Under-20. Ubesehlelweni lwe-Bulawayo Chiefs anduba abolekwe kuBulawayo City ngesizini ka2016 kodwa ubemile ukudlala enkundleni ezinkulu ngenxa yezizatho ezithile. Udlule njalo kumaqembu abalisa iRailstars, Quelaton, Black Mambas leBantu Rovers.
Phakathi kwaliviki, uSibanda utshele iphephandaba likazulu ukuba kulisizini ubumba iqembu elizakhathaza amanye.
“Sesihlomile. Sileqembu eliqine saka. Sesiyilindile isizini, kumele siyiqalise kuhle sivule amehlo ngoba kunzima kuPSL,” kutsho lumqeqetshi.
Ukukholwa kukaSibanda kubonakala ngendlela ahlanganisa ngayo iqembu. Okwamanje selisayine abadlali abathembisa ukuyikhuphula izinga lapho edlalela khona.
Ekhuluma lentatheli uSibanda uveze ukuba iqembu leli selisayine abadlali abasakhulayo abedlula abane abagoqela uBilly Veremu oleminyaka engu-24 obedlalela iNgezi Platinum obuye ngokubolekwa, uCorey-El Black okhangelele ukuhamba kwele South Africa (Absa) engathola ikhontileka, Ben Nyahunzwi ophiwe ikhontileka yomnyaka owodwa evela kuqembu leChicken Inn kuzokuthi uJoe “GI Joe” Nyabinde ophiwe ikhontileka yeminyaka emibili ikhangelelwe ukwengezwa, yena eleminyaka engu-28 yokuzalwa.
“Silomtshina ovela eGhana uSamuel Angwi Adom kanye loMbonisi Ncube ohlohle ukudlula bonke kuDivision 2.
“Ngilethemba lokuthi abafana bazadlala kuhle kulisizini ezayo. UBilly ucelile ukuthi athole ithuba lokudlala ngakho umdlali onjalo ngiyazi ngeke angilahlise, kuzakuthi umbhobho onguMbonisi sithembe uzababonisa inhlamvu zomlilo emambuleni,” kulandisa uSibanda.
Ngesimilo iqembu leli eliqede ngayo i-season ephelileyo lapho esile khona emlonyeni wengwenya umqeqetshi walo ubike ukuba ulesifiso sokuthi lalo iqembu liqedele kuzinga elingcono.
“Kudingeka ukuba sikwenqabe ukuqalisela phansi, njalo abadlali akumelanga badlale bengasakhululekanga ngoba kungatsho i-season yonke ingahle isibhedele.
“Kumele abadlali benelise ukubamba imidlalo elitshumi yokuqala ngoba yona ilakho ukubonisa ukuba i-season ingasiphelela singaphi.
“Kuqakathekile ukuba abadlali labo bazithole beqinile ngoba njengeqembu elisakhulayo sikhangelane lezidingo ezinengi njalo lokuthi singalahlisi abalandeli bethu,” kuchaza uSibanda.
