Fungai Muderere
OWAKE waba ngumqeqetshi wamaMighty Warriors uShadreck Mlauzi usencedisa ukulolonga iqembu leBosso 90, elidlala kuligi yeZifa Division One kulumhlubulo welizwe.
UMlauzi ubengumqeqetshi wamaMighty Warriors. Uke waqeqetsha leqembu labesifazane ele-In Line Academy.
Nguye umqeqetshi owafikisa ama-Mighty Warriors kumidlalo yama-Olympics edolobheni leRio deJeniro eBrazil ngomnyaka ka-2016
Ukungena kwakhe kuBosso 90, uMlauzi wenzela ukuthi agcwalisise ulwazi lwakhe kwezokuqeqetsha unobhutshuzwayo, nanko uphezulu kwezifundo zesithupha se-Confederation of African Football (Caf) A azithola elizweni leTanzania.
Utshele intatheli yeZimpapers Sports Hub wathi kuliqiniso ukuthi usencengisa kuBosso 90.
“Ngizabe ngisebenza kuBosso 90 ngaphansi kwezifundo zami zokugcwalisisa isithupha seCaf kuze kufike inyanga kaMpandula.
“Ukuba yingxenye yalithimu sekungivule amehlo. Ngamukelwa ngazo zonke izandla njalo ngiyazehlisa kumqeqetshi weBosso 90 uMelusi Mabaleka Sibanda, owangicebisa waphinda wanginikeza ikhaya eqenjini,” kutsho uMlauzi.
IBosso 90 isidlale imidlalo emibili kuligi yeZifa Division One, emhlubulweni ongezansi yelizwe. Ikunombolo yetshumi lanye, lomklomelo owodwa.
Kumdlalo odluleyo, uMlauzi uncedise uMabaleka kumdlalo wabo leqembu leNdlovu Iyanyathela. Umdlalo lo waphetha kungutshiki lobhanqa, 1-1.
UMlauzi uthe kusasemasinya ukuthi abelombono.
“Abafana bayavuma ukufunda njalo lami ngithola okunengi kubo.”
Umqeqetshi weBosso 90 uSibanda, uthe usethole umncedisi kuMlauzi.
“UMlauzi ungumncedisi omkhulu sibili. Ungumqeqeqtshi olesiphiwo njalo lami ngifunda okunengi kuye. Sithe njengeqembu, kenze akwenelisayo ngoba sifuna ukuthapha okunengi kuye,” kutsho uSibanda.
Kuminyaka edluleyo, uMlauzi waloba ugwalo lwezokuqeqetshwa kwezemidlalo lokuqinisa umzimba oluthiwa:
“Anima Sana In Corpore Sano.” Ugwalo lolu sebalwa ezikolo.
