uMthunywa
YiNtatheli kaMthunywa
NGEMVA kokuvuza izandla akwenzayo kumqhudelwano we-Afcon, unozinti u-Elvis Chipezeze usephiwe elinye ithuba lokuthi azame ukuvimba ngcono egedini kuqembu lesizwe.
UChipezeze ubizwe ngumqeqetshi omutsha wama-Warriors uJoey Antipas kuliviki obike ukuba kaboni phutha ngalunozinti ngoba ungcono kulabobonke abakhona.
Lakanye usephendukile esimeni sakudala lumdlali ngoba unconywa ngaphezulu amabala kuligi yeAbsa esanda kuqala kwele-South Africa.
UChipezeze uphenduka kuqembu lamaWarriors labanye abadlali abalitshumi ababekhona ngaphansi kweqembu eladlala ku-Afcon. Laba abadlali ngu-Alec Mudimu, Teenage Hadebe, Devine Lunga, Evans Rusike, Marshal Munetsi, Thabani Kamusoko, Kudakwashe Mahachi, Khama Billiat loTinotenda Kadewere
Ukubala ibizo lalumdlali kungabe kuhlasamulise imzimba yabanye kumuli yabalandeli benguqu. Ubengekho emcabangweni yabanengi ngenxa yokuthi ubakhumbuza mhla iZimbabwe ihlohlwa amabhola amane, kumdlalo owakhanya angathi uthengisiwe ukuze isizwe se-DRC siyephambili.
Ihlazo leli lenza uChipezeze waxolisa emphakathini.Ukuxola kwakhe kubhadele nanko usephendukile kuqembu lesizwe.
Imbali kaChipezeze inhle kwele-South Africa ngemva kokuvimba kuhle ngesizini edluleyo iqembu lakhe leBaroka linqoba iOrlando Pirates kunkezo yeTelkom Knockout.
UChipezeze wabayinsika yokunqoba kweBaroka lapho.
“Sengibonakala lami njengonozinti kuligi le,” kutsho lumdlali ekhuluma lephephandaba likazulu.
U-Antipas uqoqe iqembu lakhe labadlali abalitshumi lasitshiyagalombili elizahlasela kumkhankaso wendebe yomhlaba ka2022. Kumdlalo wakuqala iZimbabwe izadlala leSomalia mhlaka 5 kuMpandula ezweni leDjibouti.
Umdlalo wesibili uzaqhutshwa mhlaka 8 enkundleni yeBarbourfields.
Abadlali ababizwe ngu-Antipas:
Onozinti: Elvis Chipezeze (Baroka) Talbert Shumba (Chapungu).
Imvimbi: Teenage Hadebe (Yeni Malatyaspor) MacClive Phiri (Highlanders) Peter Muduwa (Highlanders) Alec Mudimu (CEFN Druids AFC)
Divine Lunga (Lamontville Golden Arrows).
Phakathi: Marshall Munetsi (Stade de Reims) Thabani Kamusoko (Zesco United) Kudakwashe Mahachi (SuperSport United) Tichaona
Chipunza (Chicken Inn) Phenias Bamusi (Caps United) Khama Billiat (Kaizer Chiefs).
Abagadli: Tinotenda Kadewere (Le Havre AC) Clive Augusto (Maritzburg United) Terrence Dzvukamanja (Bidvest Wits) Admiral Muskwe
(Leicester City) Evans Rusike (Supersport United).
