Mutithamileni mazwibhatigwa sekwatinobathamila

21 Jul, 2017 - 04:07 0 Views

uMthunywa

Tina Buhe Lobs Dube
NTEMBEZELO nkulu mumakubungano ose amunhambo yetjiKristu una pawunoswika ukabalaha banhu banjinji bamugumbo loNkololo woNdzimu. Yedza banoyedza koga koba kusanhu kukaswika lubaka gunolema. Ape kwalema banobhuda muzila yabanogala betuna nayo. Banowanika boleba matama anolema umwe nsi anopinda enhu usakatongongina munkoba wen’umba yontembezelo.

Dama loti “mutitile mazwibhatigwa matjinyo edu sekwatinobatila banotitjinyila iswi.” Banjinji banowunthama ntembezelo iwhoyu kene ndingati matama iyawa banowaleba neyabo milomo basakabhakhwa nemasimba. Bamwe banoleba koga basangatongo hakisisa kuti kolebani. Banokutola bakakuta kulelu iko kwakasima. Kutjinhu tjinolema kwazo kuti nhu atile umwe mazwibhatigwa. Nhu unoziba bgwiliza bubi ngebubi.

Ape wawumphobola unoti dzene akuphobolabo. Unohanha ape nayiye akudusa mbonje. Ndiko kwaanobona kuti nayiye wabhudilila. Ngono ntembezelo ke? Ndakabona pandakakhwibigwa mali nonhu wandaka ndigala naye. Umwe nkadzikulu wandakabudza wakabva ati “inda unohaka n’anga ilape nhu afe”.

Kwakakuwungwadza kokuti dzene yaka ilipo yaanoziba unoba akandilayila. Unonga iye ngobe andanhu awumbona eyenda kusonto. Pamwe dama lotayila. Kutjakajalo kwakahha idzo humba dzakhona dzotembezela. Dzakadzowhondilekula netjatikala.

Nayidzo dzaka dzidla masimbe emoto, dziyemula kuti dzene iyeyo mbava ingafa nofa kose. Dzimwe ndedzino ziba mitembezelo isakalulwama. Ndokumbula umwe nlumetate wakati “imi ndandingalitola zina lile ndikalitembezelela ndakalisungilila pabgwe ndibva ndiliposa ndiloba nti mamowha kuyi nayiye walobgwa nemota.” Kwaka kuleba nhu unoti unotembezela. Ngono imi sonhu waka akubadziwa ndakabona kuti banhu ibaba batjitengwa naSatani. Pamwe bakabolebelekela kuti imi nditi “tjitongonditilani.”

Tobabona banjinji bakambala zwitjena bamwe bakatjena misi nemisi kundiwa dzitsipi. Tjatinondila totjiziba kene?

Pamwe titjiziba koga tjitjatikona kuti titobele milayo yatakapiwa. Kolema kene kusakasengwa. Umwe ndiyi wakati “tjiwono tjikulu, akuna ungatjikunda tjaka kona nebanhu bantolo ibo bakabali beni, boAbrahama, boDafita boSolomoni nebamwe”. Ngono ipapo anditoziba kuti waka ekudza jinyo kuti liyende mbeli kene waka etini. Imi ndaka nditi badiyi ndibo banosa banhu muzila.

Kumwe ndekunotiwa nekuti moyo unokumbula kwawo. Nayiko kwakayi moyo wakayipa kupinda zwinhu zose, ndiyani angawunziba? Nayibo ibaba banotjinya bedza beta kuti bamwe basibatile mazwibhatigwa banoba babvumila moyo ukabakulila.

Umwe ndewakati ahanha akaboka akati “Ndzimu pamwe wakandibhatsha nosandipa bana. Pamwe ngwenuwali banoba bendidziyidza bamwe bekhwibila banhu, bamwe bethubaya bana babanhu ndikolipa neni?” Waka eboka Ndzimu netjaasinatjo. Anditoziba kuti iye unotubula batila mazwibhatigwa kene ibo basina mazwibhato banobhata zose nezwisakabalizana bhata.

Atizi! Dama lolebeleka. Iswi toliwha mahhuba ose. Ngono totobela nonlomo koga kusi nezwiyeto. Ibani bayeti bewhi, musitongoba banolileba koga musinga lithame. Dzene kubvumigwa bamwe koba kuti akutembezegwa banoba beswika betjuluka ipapeya panoti “sekwatinobatila mazwibhatigwa banotitjinyila iswi”.

Kalanga Language and Cultural Development Association
[email protected]

Share This:

Sponsored Links