YiNtatheli kaMthunywa
IMIZAMO yokuchumisa umdlali weHighlanders uDenzel Khumalo kukhanya iyehlula nanko phela abadala beqembu sebephelelwe ukuthi bamncede njani.
Ngesikhathi abakhokheli besithi bamdingela uncedo lwezazi kwezokukhuza “amahlongandlebe” anjengaye, lumdlali usuke watshaya umaneja wethimu uVezigama Dlodlo.
Loludaba lusabalale egudwini ngeviki eledluleyo, njalo iphephandaba likazulu lithole udletshana lokuthi uKhumalo wadelela umaneja lo, olingana loyise, emethesa icala lokuthi kungani emncitsha imali yeholo lomdlalo.
Kaqali ukuqina ikhanda phambi kwabakhokheli lumdlali nanko phela wehlula lenkuthazo kamqeqetshi uMadinda Ndlovu ngesikhathi esakhuza ekaMatshobana.
UKhumalo loba engakadlali okuyangaphi enkundleni, ubalelwa kubadlali abalekusasa elihle kwezomdlalo lo, hatshi kuBosso kuphela kodwa lakunguqu yesizwe.
Abalandeli beqembu abahlafune loludaba lephephandaba likazulu bathe umdlali lo uyayangisa.
Iphephandaba likazulu likhulume labafundisi ababili lesinye isazi kwezokukhuzwa kwabasakhulayo koBulawayo ababike ukuba umdlali weHighlanders lo kumele akhuzwe ngendlela eyiyo.
UBarnabas Tshuma otshumayela kwelinye lamabandla uthe inkinga kaDenzel ifuna ukuhlolisiswa ukuze kwaziwe ukuthi ivela ngaphi.
“Mhlawumbe lumfana kukhona okumkhathazayo angeke akutsho ebantwini bonke. Isicebiso sami yikuthi kudingwe umuntu okhatshana leqembu ongahlala laye phansi azwisise okusengqondweni zalujaha. Akulamuntu ongakhuzekiyo,” kutsho umfundisi.
Isazi kwezokukhuzwa kwabasakhulayo uNkosikhona Dube uthe udaba lolu aluhlaseli umdlali oyedwa.
“Banengi abadlali esibabona bephambuka, uDenzel ayisuye yedwa. Asibambaneni laye umfana akhuzwe. Kwandise ukuthi amaqembu amakhulu njengeBosso aqhatshe odokotela labo esithi ngama-psychologist. Akudingwe lowo muntu, hatshi ukusola umdlali kuphela.”
Lomgcinisihlalo weHighlanders uKenneth Mhlophe uvumelana lokuthi umdlali wabo udinga usizo.
UMhlophe uthe iqembu laqoqa ukuthi uDenzel akhuzwe ngakho kwaba lokudingisisa ukuthi kuyini okuhlupha lumdlali.
“Ngiyathaba ukulazisa ukuba abafana bayahlonipha, bazibambile. Kodwa kulendaba kaDenzel Khumalo.
“Umdlali lo, osakhulayo wajeziswa njalo usephendukile ukuzololonga leqembu. Abaqeqetshi bamkhangelisise kakhulu. Umdlali lo usethola usizo lokujulisisa ingqondo ukuze aphakamise ithalenta lakhe,” kutsho uMhlophe.
USipho Hlabangane weMagwegwe North uthe esintwini kuyazila ukuthi umntwana afake umuntu omdala isandla.
“Loba kuthiwa umuntu omdala usekukhubazile, ngeke ubelesibindi sokumtshaya. Pho uDenzel isibindi sokutshaya umaneja wasithatha ngaphi? Kahlaliswe phansi umfana akhuzwe,” kutsho lumsekeli esecingweni.
UKhumalo akubuzwa muntu ukuthi ulethalenta likanobhutshuzwayo kodwa lumdlali ubeselihlongandlebe, okwenze waswelakala emdlalweni.
Umgcinisihlalo weBosso wazise ukuba uyakholwa ukuthi akusoze kube lokungezwani phakathi kwabadlali lenkokheli. Ekuqaliseni komnyaka abadlali beBosso bakhalala umsebenzi okwamaviki amathathu besithi bafuna iholo elingcono.