MAYUYU! KUZALUNGA

07 Feb, 2019 - 00:02 0 Views
MAYUYU! KUZALUNGA uKenneth Mhlophe

uMthunywa

Nkosilathi Sibanda
UMGCINISIHLALO weqembu leHighlanders uKenneth Mhlophe uthe uyaxolisa ngodubo lokungabhadalwa kwabadlali baleliqembu, wagcizelela ukuba kuzalungisiswa ngesikhathi esifitshane.

UMhlophe utsho lokhu kulandela ukukhalala ukulolonga okwenziwe ngabadlali besenkambeni yokulolonga kwenye indawo, okutshiye umqeqetshi uMadinda Ndlovu ebambe ikhanda.

Umdlali uAdrian Silla, kuzwakale ukuthi akafuni lakuzwa elokuthi aphenduke enkambeni yokulolonga ikanti lonozinti uAriel Sibanda uvele waphuma elubhekise kwakhe.

Bonke abadlali baphume bethelile beqonde ngakibo bekhonona ngokuthi bancitshwa imali yabo, ngokutsho kwabafakazi abaqotho abachathekele amaphephandaba udaba.

Insindabaphenduli le, esiphice zonke izikhulu zeqembu zaswela lapho ezingacatsha khona ngoba inhlawulo yabadlali ayiphumi eqenjini, kodwa ivela kunkampani yeNetOne.

NgoLwesithathu emini, uMhlophe wazise iphephandaba likazulu ukuba abadlali abafake amaphiko phansi ngoba isivumelwano sabo leqembu sizalungiswa.

“Sisakhulumisana labasekeli bethu iNetOne okwakhathesi. Abadlali bengalahli ithemba becabanga ukuthi siyabaqila, hatshi, siyazi isimo abakuso kodwa sicela ukuthi baxole baphange baphindele enkambeni. Inkinga ababhekane lazo sizazilungisa,” kutsho uMhlophe.

Umgcinisihlalo lo ubike ukuthi uthole isikhathi sokuthi akhulumisane labaphathi beNetOne izolo (ngoLwesithathu) loba nje kungatholakalanga impumela yomhlangano ngesikhathi sokuya dindwa kwephephandaba.

IHighlanders ihlanganise abadlali abangamatshumi amabili lasikhombisa okuyibo abafunwa nguMadinda.

Inengi labo selisayinile izivumelwano zokudlalela iqembu njalo kugcwele abafana abasakhulayo.

Iqula labadlali bakaMadinda laba lathola usekelo lukaMhlophe, encoma ukuthi lilethalenta njalo yibo abadlali abazaletha injabulo eqenjini.

Loba ezizwa edatshulwe yisenzo sabadlali bakhe, umgcinisihlalo weBosso uthe likhulu ithemba alalo kubadlali laba.

Ukukhalala ukudlala kwabadlali kuza njalo eduzane kokuqhutshwa komhlangano womnyaka walithimu lapho okwakhulunywa kabanzi ngesiphatho sabadlali lokuthi isikhwama seqembu siphethwe kahle.

Ngesizini edluleyo uMhlophe watshayela iqembu ihlombe esithi abafana abasakhulayo sebekhuthaze abalandeli ukuthi bagcwalise inkundla yeBarbourfields.

“Umsebenzi owenziwe ngabadlali bethu bonke kanye labaqeqetshi uyancomeka. Singabe sehlulekile ukuthi siqede siphezulu kodwa ukudlala kwabafana kusithabisile,” nguMhlophe lo ekhuluma ngomnyaka odluleyo.

Waphinda watsho ukuba akumelanga ubudlelwano beqembu lenkampani yeNetOne buphazamise ithimu ngoba ngeke yenelise ukuncintisa ngesikhwama esincinyane.

Share This:

Sponsored Links