uMthunywa
Joel Ndlovu
ABALIMI sebekhuthazwe ukuba balwise imikhuhlane lezibungu ezibulala imibhida ngokufafaza imithi ukuze isilimo sabo singafi.
Ekhuluma lentatheli kaMthunywa uNkosikazi Agnes Ndebele oyingcitshi kwezokulima esabelweni seMatabeleland North uthe kumele abalimi bahlale belemithi yokulwisa izibungu kanye lemikhuhlane ehlasela imibhida.
“Kuqakathekile ukuthi umlimi ahlale elemithi yokufafaza umbhida wakhe ukwenzela ukuthi abulale izibungu ezinjengentwala zemibhida (ama-aphids). Intwala ziyingozi kakhulu ngoba ziyaswabisa umbhida uwuthole angani usugoqeka, lokhu kwenza umlimi angabi lesivuno esihle ngakho-ke kumele asebenzise imithi yokuzibulala,” kutsho uNkkz Ndebele.
“Eminye njalo imikhuhlane ingabangela ukuba amahlamvu ombhida aphenduke umbala abe lithanga. Umkhuhlane lo uyabulala umbhida njalo umlimi angawuphuzela umbhida wakhe uyafa yikho nje kumele ahlale eyifafaza,” kulandisa uNkkz Ndebele.
Uqhubeke esithi imikhuhlane lezibungu ayisikho kodwa okubulala imbhida, ukuswelakala kwamanzi embhideni kuyawubulala lakho.
“Ngaphandle kwezibungu lemikhuhlane, imibhida kumele uyithelele ngamanzi amanengi ukwenzela ukuthi angene phansi enhlabathini aye empandeni ngoba yikho lapho okwenziwa khona ukudla kombhida.
“Umbhida ungaswela amanzi ilanga litshisa kakhulu uyafa.”
UNkkz Ndebele uphethe ngokuthi kuqakathekile ukuthi abantu bavatshele izitolo ezithengisa imithi ukwenzela ukuthi bethole ulwazi ngemithi abangayisebenzisa ukuthi bavikele izilimo zabo.
