uMthunywa
Nkosilathi Sibanda
NGENYE isizini uMadinda Ndlovu waphuma enkundleni esethelwe ngempuphu. Kungenzeka bamphinde njalo abasekeli beHighlanders lonyaka.
Ukudliwa kweHighlanders akujabulisi ngitsho, abalandeli bayo sebefuna ukuthi lumqeqetshi axotshwe.
Abakhulumi nje, bayalawula laba abalandeli abaphume bezondile ngemva kokunqotshwa 1-0 yiTriangle eMagumeni.
Loba izamile ukulichaya ibhola, abadlali beBosso bakhuthe igedi kanengi, batshengisa ukuthi behluleka ukumela umthwalo.
Kodwa emehlweni abalandeli, iqembu liqine saka ngabadlali. Inkinga kubo ngumqeqetshi. Bathi kungani uMadinda esephenduke waba ngunsimbi ayigobi, umqeqetshi ongatshelwa lutho.
Kungumbono wabasekeli labahlaziya umdlalo wenguqu ukuthi uMadinda usehlale isikhathi eside ebika ukuthi wakha ithimu.
Ngesizini ka2018 ungene ngesivuvu lumqeqetshi wabika ukuba ubumba iBosso ezanqoba inkezo ngo2019. Loba kusadlalwe imidlalo emine, akula mlandeli olethemba lokuthi uMadinda uzakwenelisa lokhu.
Lakanye uMthunywa wakubika ngesizini edluleyo ukuthi kuzakuba lombuzo wokuthi indlu eyakhiwa nguMadinda izaphela nini.
Umbuzo wavela ekuthini iqembu leli elaphiwa ibizo elithi ECD alizange liphethe isizini lidlala kuhle.
Umqeqetshi lo waphikelela ebika ukuthi “uyakha” lokuthi ngo2019 uzayithwala inkezo yeligi.
Ekufikeni kwakhe, lumqeqetshi wathi umsebenzi wakhe kuBosso ayisiwo wokuvuselela lokulungisisa obekufile.
Inyathelo likaMadinda lokudlalisa abafana abasakhulayo liyancomeka kodwa phela abantu bangena enkundleni bekhangelele ukunqoba hatshi ukuqakeza.
Inkuthazo evele kubasekeli beHighlanders iqonqosela ukuthi uMadinda engekela ukunqoba, uzaphuma ngendlela axotshwa ngayo ngomnyaka ethelwa ngempuphu.
“Uyasidanisa lubaba (uMadinda). Kuyoze kube nini singatholi inguqu esiyikhwabithayo? Sidliwe ngamathimu okumele siwanqobe?” kubuza umlandeli weBosso oseNyathi uKhulumani Nkiwane othe wazisola ukuthi wagada ibhasi esiza eBarbourfields ngoMvulo.
UDumolwakhe Sikhosana ongomunye wabasekeli uthe bajabula bebona iqembu linqoba iDynamos kunkezo kaZibuse. Uthe okwabadanisayo yikuthi ukunqoba lokhu akubonakalanga iqembu lidlala ekhaya.
“Mhlawumbe iqembu lalithabe kakhulu linqoba iDynamos. Umqeqetshi katshintshe ukwenza ngoba isikhathi siyahamba. Sifuna impumela.
Omunye njalo umsekeli uqobo weBosso uNkululeko Tshambo usegcizelele kanenginengi ukuba uMadinda kanikezwe isikhathi ukuze afeze inhloso yakhe.
Uthe loba abalandeli befuna impumela ngamehlo abomvu, kumele bakwamukele ukuthi umqeqetshi uyazi akwenzayo.
“Kumele sibekezele, sikholwe ukuthi uMadinda nguye umqeqetshi ozayiletha eMagumeni inkezo yeligi.”
