uMthunywa
Nkosilathi Sibanda
UTHE engena kwezomculo eseFolosi, uAndrea “The Vocalist” Sibanda wayengazi ukuthi useqale uhambo oluzamenza abeyintandokazi yomuntu wonke.
Ngenxa yodumo lwethalenta lakhe, umhlabeleli lo, oleminyaka engu-13 yokuzalwa, usekhethwe kumbango wesicoco sama National Art Merit Awards (Nama) kuhlandla le-Best New Comer.
Lesi yisiqalo kumbali yezicoco zeNama ukuba lomhlabeleli omncinyane njengo-Andrea ukubizwa enkundleni eziphezulu.
Umkhosi wezicoco lezi uzaqhutshwa mhlaka 25 Nhlolanja eHarare.
Banengi abaculi abasungule imsebenzi yabo ngomnyaka odluleyo kodwa akula ofikise izinga lakhe.
Umculi lo wahlabela ingoma ethi “Uhambo” lapho aphinda wayicula lo-Aubrey Qwana kwele-South Africa besenza ividiyo yalingoma.
Le yiyo ingoma emenze wakhethwa kumbango wezicoco zeNama.
Kuluhlu olukhitshwe ngabaqoqi beNama ngoLwesibili emini, u-Andrea uzancintisana loTavonga Leo Magombedze owaziwa ngelithi Leo Magozz, uFarai Gadzani (Bling 4) loBrian Kadyamarunga ozibiza ngokuthi nguBrian Jeck lo-Silas Mavende aka Saint Flo.
Ngokucubungula kwephephandaba likazulu kulandela ukukhitshwa koluhlu lweNama, bakhona abalandeli bezomculo abathi isicoco kumele siye ku-Andrea.
UMkhululi Hadebe ongomunye ohlanyiswa zingoma zika-Andrea uthe kungaba kuhle nxa kunganqoba umculi amthandayo.
“Mina ngilikholwa elinzima. Ngilalela ingoma zokholo njalo le eyahlatshelwa nguAndrea iyangibusisa kakhulu. Ngimfisela inhlanhla,” kutsho uHadebe.
UThando Nyoni ohlala eLupane uthe wamukele udaba ngokujabula.
Imbongi uObert Dube
“Akula omunye ongaphiwa lesi isicoco ngaphandle kuka-Andrea. Ngaphandle nxa bengamncitsha nje, kodwa kusegcekeni ukuthi ingoma yakhe Uhambo ithandwa ngabanengi izwe lonke.
Kulabo abadabuka kulumhlubulo welizwe ababizwe kumaNama kubalisela iqembu le-Umkhathi
Theatre Works eliphuma elokitshini leNjube koBulawayo.
Kuleliqembu, umqondisi walo uMatesu Dube ukumbango we-Best Director kumdlalo wabo othi Bayethe Nkosi. Leqembu leKhaya Arts lamalunga alo, likhethwe ukuncintiswa kulezizococo. Imbongi yeFolosi uObert Dube loSithandazile Dube ngabanye okukhangelelwe ukuthi banqobe.
