uMthunywa
YiNtatheli kaMthunywa
UZULU usexwayiswe ukuthi aqaphele ukumemetheka kwegcikwane le-coronavirus nanko phela kubikwa inani lalabo abahaqwe ngumkhuhlane lo, ngoLwesibili likhuphuke laya ku-1 365 kukanti abangu-34 babulewe ngumkhuhlane lo.
NgoMvulo kubanjwe abantu abangu-774 njalo kube yisitshengiselo sokuthi ubhubane lolu soluqalile ukuqothula abantu njengalokhu obekutshiwo ngodokotela, njengoba nje ngoLwesibili inani liqanse laya ku-1 365.
UMsekeli kaMongameli njalo onguMphathintambo wogatsha lwezempilakahle uDokotela Constantino Chiwenga, ngoMgqibelo ntambama uveze ukuthi ilizwe selizakubuyela ku Level 4 we-lockdown ngenhloso yokuzama ukuvimba ukumemetheka kwe-Covid-19.
“Imigomo esikhethe ukuyifaka izakubona kuvalwa indawo ezinengi zamabhizimusi ngaphandle kwamavinkili athengisa ukudla kanye lemithi, lokhu kuzakwenqabela ukuhlangana kwabantu abanengi; amasonto, amabhawa, imitshado, indawo zokudlela kanye lezokuzivocavoca zizavalwa.”
Kumbiko wogatsha olubona ngezeMpilakahle womkhuhlane weCovid-19, ngoLwesibili koBulawayo kubanjwe abantu abangu-110 abatsha, eHarare 777, Midlands 78, Matabeleland South 6 kuthi eMatabeleland North 27.
Inani labantu abafileyo libe phezulu kakhulu eHarare lapho okufe khona abantu abangu 10 koBulawayo 7, kuthi e-Midlands oyedwa.
Abantu bonke ababalwe ngoLwesibili kubikwa bathelelane phakathi kwelizwe kakho oke wavakatshela kwamanye amazwe.
Kusukela ekuqaleni kokubala inani labantu ababanjwe lubhubhane lolu ngoMbimbitho emnyakeni owedluleyo, inani selifike 17 194 njalo abangu-418 sebebulewe yisifo lesi.
“Abantu kabalandele izixwayiso bahlale ezindlini okwamalanga angu-30 abekiweyo ukuze sivikele ukumemetheka kwesifo lesi.
“Emisebenzini kukhangelelwe ukuba kuhambe abasebenzi abaqakathekileyo njalo abalemisebenzi egoqela ukusiza abantu,” kulandisa uDkt Chiwenga ngoMgqibelo.
KoBulawayo kuvuke kuthule ngoLwesibili kanye lango Lwesithathu okutshengisele ukuba abantu bayakulandela ukuhlala endlini bezivikela.
