Uncategorized

‘Lude uhambo majaha eBosso’

09 May, 2024 - 00:05 0 Views
‘Lude uhambo majaha eBosso’ Abadlali be Highlanders bethokozela ukuhlohla iChegutu Pirates kungekudala

uMthunywa

Lovemore Dube

OWAKE wadlalela iHighlanders FC, uAlexander Maseko uthe iqembu leli kalikafiki kubanga lokuthi lingacatshangelwa ukuthwala inkezo yeCastle Lager.

Lokhu ukuchaye kungxoxo abelayo lentatheli yephephandaba likazulu kuliviki.

UMaseko uthe kusaselomsebenzi okumele wenziwe.

“Kusaselomsebenzi. Iqembu lilokuqamuka lapha lalaphaya emdlalweni. Kumbalwa okumele kucubungulwe, kulungisiswe. Lude loluhambo,” kutsho uMaseko, owanqoba kuLigi, wabuya wathatha lenkezo yeZifa Cup ngo-1990.

“Ngaphandle kokuthi bathathe inkezo yeligi, abadlali beHighlanders bahlala bebukwa njengabafana abancane,” kutsho uMaseko.

UMaseko uthe iqembu lixega enkabeni lapho okuloMbeba loMuduhwa.

“Thina sasilabo Willard Khumalo, Tito Paketh, loAmin Soma-Phiri besenza yonke imisebenzi labo Titus Majola. Okuyiyo indlela okumele kusetshenzwe ngayo nxa iqembu lizaphumelela. Kabalungise khonapho, badlale ibhola lokunqoba.”

UMaseko owaba yimvimbi yodumo edlala esiswini senkundla, ephenduka enhla yenkundla, eloDouglas Mloyi, Richard Ndlovu loSimon Ncube, uthe indlela uAndrew Mbeba loPeter Muduhwa abaziphatha ngayo kayithandi. 

uAlexander Maseko

Uthe kumele badonse amasokisi.

Ngesizini edluleyo, uMuduhwa wehluleke kwabalitshumi lanye abadlale kuhle, ngenxa yokungaziphathi kuhle enkundleni. 

UMaseko uxwayise izikhulu labaqeqetshi beHighlanders ukuthi bahlale phansi labadlali, babafundise okumele bakwenze nxa befuna ukuba zintshantshu zeligi.

“Iqembu kumele libonisane labo abadlali. Kumele bahloniphe uphawu lweqembu lomphakathi obasekelayo. Kumele bakwazi ukuthi unompembe nguye umphathintambo,” kutsho uMaseko.

UMaseko ngomunye wabadlali ababikwa badlala kuhle kudala, ngokunqoba phose kunkezo zonke ezazidlalwa ngaleyo minyaka.

Uzigqaja ngokuthwala inkezo ezibalisela iObat Rosebowl, Rothmans Shield, Castle Cup, Chibuku Trophy leZifa Cup. Waba yingxenye yabadlali abahlonitshwa ngokuthatha umklomelo weligi ngo-1990.

Uthe ngemva kokubona abadlali abanjengoPrince Ndlovu kumnikeze ithemba lokuthi kwelakukusasa umdlalo uzafika ezingeni elikhulu.

UMaseko wasuka wayadlalela iqembu leMamelodi Sundowns ngo-1991, kwathi ngo1993 wathola isicoco seligi.

Usehlala eSouth Africa lapho alamabhizimusi khona.

 

 

Share This:

Sponsored Links

Survey


We value your opinion! Take a moment to complete our survey

This will close in 20 seconds