‘Liyeza izulu’

09 Jan, 2020 - 00:01 0 Views
‘Liyeza izulu’

uMthunywa

ILIZWE likhangelelwe ukuthi lithole izulu elingcono kusukela ngoLwesihlanu kusiya kuviki ezayo njalo lizabe liduma kwezinye indawo ezifana leMatabeleland North, endaweni ezisenyakatho yeMidlands, izabelo zonke zeMashonaland, eHarare kanye lendaweni ezisenyakatho yeManicaland.

Indawo ezinengi zikhangelelwe ukuthi zithole izulu elilutshwana kukanti ezinye zizathola isilinganiso esiphakathi kwe-20 le 30 millimetres ngemva kwamahola angu-24.

Ngenxa yokutshisa okukhona, izulu lizabe liphazima kakhulu kwezinye indawo kungakho uzulu ukhuthazwa ukuthi aqaphele.

AbeMeteorological Services Department baveze izolo ukuthi kuzakuba lomdumo wezulu kwezinye indawo zelizwe.

Kukhangelelwe ukuthi ukuna kwezulu kube ngcono kusukela mhlaka 10 kusiya ku-14 Zibandlela 2020 njengoba kuzakuba lokungena kobumanzi obuvela enyakatho kanye lentshonalanga yelizwe.

Nxa sesikhuluma ngesilinganiso sezulu, izulu kalisoze libe linengi endaweni ezinengi, lizabe liphakathi kwe-10mm kumbe libe phansi kwalesisilinganiso.

Kusenjalo, kungenzakala ukuthi kube lendawo ezizakuba lezulu elikhulu zithole isilinganiso esiphakathi kwe-20 kusiya ku-30mm kumahola angu-24. 

Ngenxa yokutshisa okukhona khathesi izulu kalisoze liphathise kakhulu, lizakuba lomsindo kwezinye indawo njalo uzulu ukhuthazwa ukuthi aqaphele, kutsho iwofisi yeMet.

Share This:

Sponsored Links