Uncategorized

Liyaqhubeka icala lesotsha lokuzama ukutshontsha lihlomile

19 Nov, 2020 - 00:11 0 Views
Liyaqhubeka icala lesotsha lokuzama ukutshontsha lihlomile (umfanekiso wakudala)

uMthunywa

Wayne Ncube
UMTHETHWANDABA weTredgold koBulawayo udlulisele phambili icala lesotsha elazama ukutshontsha imali ngokwethusela ngombhobho e Lobengula West ngeviki ephelileyo.

Umantshi kucala leli uShepard Mjanja ngoLwesibili ubikele inkundla ukuba icala likamsolwa u-Ian Sibanda (56) owayelisotsha, owabotshwa ngesikhathi ezama ukutshontshela isalukazi ethwele umbhobho, lizadluliselwa phambili kumhlaka 23 Lwezi.

USibanda owayehamba loLearnmore Kwari (30), olokhu edingwa ngamapholisa bafika eLobengula West emzini kaNkosazana Livia Matshazi bazama ukutshontsha imali ababelolwazi lokuba kwakungeyokuthenga indlu.

Umantshi uMjanja ubikele inkundla ukuba icala likaSibanda kumele lidluliselwe emthethwandaba weRegional Court ngoba inkundla le akuyo ingela lungelo lokuthetha amacala alabo abatshontsha behlomile, ikakhulu ngombhobho.

Umtshutshisi walelicala uMnumzana Denmark Chihombe ubike ukuba umsolwa wabotshwa ngemva kokuba ehlaselwe wabanjwa ngumzukulu kaMatshazi ngesikhathi ekhombe inina leli ngombhobho.

“Mhlaka 10 Lwezi, umsolwa lomunye wakhe ongakabanjwa bafika endlini kaNkosazana Livia Matshazi eLobengula West ngezikhathi zabo 6:30 ntambama belenhloso yokutshontsha imali ababecabangela ukuba ikhona njalo ngeyokuthenga indlu.

“Ngesikhathi uSibanda ekhipha umbhobho ewukhangelisa kuNkszn Matshazi, umzukulu kaMatshazi wameqela wamhlasela ngesigodo sokudlala igalufu okwenza lumzukulu labomakhelwane bacina bebamba umsolwa kwaze kwafika amapholisa,” kulandisa uMnu Chihombe.

Share This:

Sponsored Links