Brandon Moyo
UKUNQOBA kweqembu le-Tuskers nge-wicket eyodwa ku-Eagles, eTakashinga Cricket Club eHarare ngeSonto kuyifake endaweni yamaqembu amathathu aphezulu ku-2024/25 Pro50 Championship.
Ingqikilana leqembu le-Eagles, iTuskers yayihlezi emsileni ngemiklomelo emine emidlalweni emihlanu. Iqembu lakoBulawayo leli lalinqobe kanye kuphela, lanqotshwa kabili, kumidlalo emibili lingaphumi lalutho.
I-Eagles iyakhokhela ngemiklomelo eyisithupha njengoba yanqoba kumidlalo emithathu yehlulwa kabili emidlalweni emihlanu yokuvula isizini. Okwakhathesi isibambene le-Tuskers ngemiklomelo eyisithupha.
IRhinos ikhokhela ngemiklomelo eyisikhombisa, ilandelwa yi-Eagles leTuskers. Endaweni yesine kuleSouthern Rocks elemiklomelo emihlanu. Iqembu leMeaga Market Mountaineers liphansi ngemiklomelo emine.
I-Tuskers idlalele ukuthi iqinise indawo yayo phezulu. Yakhetha ukuthi ijike ibhola kuqala, yenelisa ukukhipha bonke abe-Eagles nge-193 runs, ku-43,1 overs.
Yona iqede ile-194/ 9 nge-48 overs.
Kukhitshwe uTadiwanashe Marumani ele-11 runs, uTinashe Kamunhukamwe (26 off 19 balls) loRodney Mupfudza (14). Kulandelwe ngokukhitshwa kukaDion Myers, Craig Ervine loWessly Madhevere loTony Munyonga.
Umdlali obelosuku oluhle kuqembu leTuskers ngu-Ernest Masuku ojike ibhola wathatha ama-wicket amane kumabhola ngu-33. Usekelwe nguLuke Jongwe (2/41) loBrandon James (2/27). UNkosana Mpofu lo-Ainsley Ndlovu bathole i-wicket munye ngamunye.
Bekungelula kuTuskers nanko lilahlekelwe ngama-wicket amathathu ku-41 runs, uTanunurwa Makoni eletha i-21 runs. UBrian Chari loWill Fraine balinganise umdlalo benelisa ukuhlanganisa i-66 runs, andubana uFraine akhitshwe ele-37 ngesikhathi iqembu liku-115/4.
