uMthunywa
Nkosilathi Sibanda
ABALANDELI bomculo kaMzoe 7, sebevumelana ukuthi umhlabeleli lo wenze kahle kungoma yakhe yomhlobo wama-Piano ethi, “Imali”.
Ingoma le, ekhuluma ngokuphithizela okwenziwa ngabantu ukuze bathole imali iqale ukuzwakala emsakazweni mhlaka 20 Nkwenkwezi, kodwa ngemva kwenyanga ezintathu nje, isingenye esihlala iqhunswa ngenxa yokuthi ithandwa ngabanengi. Kulingoma uMzoe 7, olebizo lokuzalwa elithi Paul Mlauzi, usebenze labaculi ababalisa uGlynnis Manuel osebenzisa ibizo elithi Maggie, loThembinkosi Zhou, owaziwa ngelithi Master Zhou.
Ekhuluma lephephandaba likazulu kuliviki, uMzoe 7 uthe ingoma yakhe ihlangene umhlobo womculo wamaPiano le-Afrobeat.
Thembinkosi Zhou
Umculi lo uthe ufaka umbuzo emphakathini, wokuthi imali yavela ngaphi, ngoba nanko ifunwa ngumuntu wonke mihla ngemihla.
UMzoe 7 uthe okwamkhuthaza ukuloba ingoma le yikuphithizela kwemuli, zidinga yona imali.
“Ngaloba ingoma le ngemva kokukhuthazwa yikuphithizela kwansuku zonke empilweni,” kutsho uMzoe 7.
“Ngavakatshela elokitshini leMakokoba ngabona ubunzima bempilo, ngahle ngaba lomqondo wokuthi ngicule.”
Uthe ingoma le wayikhuthazwa njalo yimuli yeMakokoba elebhizimusi lokupheka ukudla, elibizwa ngokuthi yi-Mama Ble’s Corner.
“Ukuphithizela kwabo kwangikhuthaza ngoba bakwenza njengomdeni futhi bakwenza endaweni abahlala kuyo. Bagcina abantu besigaba sabo bondlekile. Ngaze ngaqhubeka ngokuthatha ividiyo yengoma endaweni yabo njalo bangamukela kuhle,” kutsho uMzoe 7.
Uveze ukuthi abantu asebenza labo kungoma le yiKaitse Films, eyethatha ividiyo, iCorey Visuals eyayithatha imifanekiso ngesikhathi kuthathwa ividiyo yengoma, X Studios loChristopher Sithole owaziwa ngelithi Hitkid.
