Ethel Ncube
KULEQEMBU labahlabeleli beNkayi eselizakhele udumo ngokuhlabela umculo weRhumba eliwuphakulela abantu ezitaladeni zakoBulalawayo.
Iqembu leli elikhokhelwa nguSifundo Nkala libizwa ngokuthi Amazwi Amahle Express band njalo lilabaculi abayisikhombisa okugoqela amantombazana amathathu labafana abane.
Intatheli ixhumane loSifundo oveze ukuba njengeqembu bazimisele ukusa umculo wabo khatshana.
“Ngaqala ukuhlabela ngo2020 ngakhipha amadlalade amabili. Elokuqala idlalade lilengoma eziyisithupha ibizo ledlalade lithi ‘Ukuswela imali’. Kuthi idlalade lesibili lithi ‘Okwakithi kuyavuma’ lona lilengoma eziyisithupha. Khathesi sesileqembu eliqhunsa ezitaladeni zakoNtuthu ngendlela ehlabusayo.
“Sihlabela umculo weRhumba njalo silesifiso sokuthi umculo wethu uyephambili kodwa kunengi okusilelayo. Okwakuqala esikudingayo yiziginci ukuze sitshaye umculo wethu ngobunono obukhulu.
“Phose malanga onke sivukela edolobheni sihamba sitshaya ingoma ezitaladeni lokhu sikwenza ngoba sizama ukuthi saziwe ngabantu,” kubika uSifundo.
Uqhubekele phambili echaza ukuba iqembu lakhe lisaqala kungakho badinga usekelo.
“Sithanda ukucela abahlali bakoBulawayo ukuba belule izandla basiphathise ngalokhu abakwenelisayo ngoba ukukhula kwe-band yikukhula kweNkayi lapho esidabuka khona.
“Abafisa sibatshayele kumicimbi etshiyeneyo likhululekile ukusimema sizotshaya siphinde sigiye ngoba iqembu lethu lilamagabazi njalo agida kube luthuli,” kuphetha uSifundo.
