Limukani umqando uyatshabalalisa izilimo

09 Jun, 2022 - 00:06 0 Views
Limukani umqando uyatshabalalisa izilimo

uMthunywa

Khanyile Ndebele
UMQANDO uyatshabalalisa izilimo ikakhulu nxa ubuya umkhulu, kungungqwaqwane kumbe isithwathwa ngakho umlimi kufanele alimuke enanzelele njalo ezame ukuvikela izilimo zakhe ukuze zingatshabalaliswa ngumqando.

Omunye umlimisi uMnumzana Jilly Ncube ufundise abalimi ngendlela zokuvikela umqando ikakhulu nxa kulongqwaqwane lesithwathwa.

UMnu Ncube uqale ngokuveza ububi obuza lomqando lokufanele abalimi bakunanzelele ngawo ukuze izilimo zingafi.

“Ungqwaqwane ungaba phezulu kwamahlamvu esilimo uyavala izikhala izilimo eziphefumula ngazo okubangela ukuthi zife.

Okuqakathekileyo umlimi afanele akunanzelele ngomqando okhona yikubona ukuthi umkhulu okunganani njalo lokuthi uqala nini uphinde uphele nini, lokhu kuzenza ukuthi ahlale elimukile njalo akwazi ukuthi uwuvikela njani,” kutsho uMnu Ncube.

Uqhubeke waveza indlela umlimi angavikela ngazo izilimo zakhe ukuze zingafi ziphele ngomqando.

“Okwakuqala umlimi angakwenza yikulima izilimo ezimelana lomqando.

Okwesibili yikufaka umquba ezilinyweni.

Umquba uyembathisa impande zezilimo.

Ukusukuma kwenhlabathi kuyafuqela impande phezulu zibe segcekeni ngakho umquba uyavala uzivikele emqandweni.

“Umquba uyagcina ukukhudumala emhlabathini.

Ngesikhathi somqando izilimo ziyalahlekelwa ngamanzi amanengi ikakhulu nxa umoya uvunguza kakhulu, umquba ugcina amanzi umhlabathi uhlale ukhudumala zivikelekile emqandweni,” kutsho uNcube.

Uthe okunye abalimi abangakwenza yikufaka izilimo kuma-green house kanye lokuvala ngelembu elilemboko.

“Abalimi okunye abangakwenza yikufaka izilimo ku-green house, ikakhulu lezi eziyabe zihlanyelwe emagabheni.

Bangembesa izilimo zabo ngelembu elilemboko.

Lokhu kuyavikela izilimo kungqwanqwane lesithwathwa.

“Nxa sekusemini kufanele abalimi bakhuphe ilembu ukuze sithole ilanga elaneleyo besekusithi nxa ilanga selitshona bezivalele ukuze benelise ukubamba umoya okhudumalayo,” kutsho uMnu Ncube.

Uphethe ngokuthi abalimi kufanele benqabele ukuthelela besebenzisa indlela efafaza amanzi ngoba amanzi nxa esehla sengafana longqwaqwane, ngakho abazame ukusebenzisa i-drip irrigation.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds